Святаславу Барановічу прысудзілі тры гады калоніі агульнага рэжыму. Такі вырак вынес суд Маскоўскага раёна сталіцы 12 сакавіка. У прысуд яму залічылі час, праведзены пад вартай да суда — з 3 кастрычніка 2017 года па 11 сакавіка 2018-га.
Пасля абвяшчэння прысуду публіка ў зале стала крычаць "Ганьба!"
Як паведамлялася раней, Барановіча вінавацілі ў гвалце ў дачыненні да супрацоўніка міліцыі. Пасля "Маршу недармаедаў" увесну 2017-га Барановіч абараняў анархістаў, якіх затрымлівалі міліцыянты ў цывільным.
У каментары Еўрарадыё кіраўнік Беларускага Хельсінскага камітэта Алег Гулак заявіў, што праваабаронцы не прызнаюць Барановіча палітвязнем, бо ён ужываў гварт у дачыненні да фізічных асобаў.
Дарэчы, у 2011 годзе Барановіча асудзілі на тры гады “хатняй хіміі” за ўдзел у Плошчы-2010. Тады праваабаронцы прызналі яго палітвязнем у ліку іншых.