Аляксандр Лукашэнка неабыякавы да далейшага лёсу самай вядомай беларускай тэнісісткі Вікторыі Азаранкі. Пра гэта паведаміў кіраўнік Беларускай тэніснай федэрацыі Сяргей Цяцерын.
Як вядома, у канцы кастрычніка ў ЗША мусіць адбыцца суд аб апякунстве над сынам Вікторыі Леа. Беларусцы даводзіцца судзіцца з былым бойфрэндам Білі Макігам, бацькам хлопчыка. Тэнісістка з-за гэтага з ліпеня не выступае. Нядаўна многіх здзівіў здымак, на якім Азаранка страшэнна схуднелая. А 11-12 лістапада на “Чыжоўка-Арэне” ў Мінску мусіць прайсці фінальны матч Кубка федэрацыі Беларусь — ЗША і беларуская зборная спадзяецца на дапамогу тэнісісткі.
Як інфармуе сайт tennis.by, Цяцерын спадзяецца, што Вікторыя Азаранка згуляе ў Мінску. Паводле яго слоў, да вырашэння праблемы падключыліся МЗС, Беларуская тэнісная федэрацыя і нейкія “іншыя структуры”. Аляксандр Лукашэнка, “нягледзячы на велізарную загружанасць дзяржаўнымі справамі, цікавіцца і кантралюе гэтую сітуацыю”. Для таго, каб Вікторыя магла праводзіць паўнавартасныя спарынгі і падтрымліваць неабходную форму, у ЗША з Беларусі гатовыя адправіць “чалавека-прафесіянала”.