Ганаровы старшыня Таварыства беларускай мовы Алег Трусаў прапанаваў, каб суддзі вывучылі беларускую мову. І, такім чынам, патрэбы ў паслугах перакладчыкаў не будзе. А вызваленыя грошы можна выкарыстаць на пераклад заканадаўчых актаў.
У чацвер у Палаце прадстаўнікоў прайшоў круглы стол “Заканадаўства на беларускай мове: праблемы і практычнае вырашэнне на аснове Канстытуцыі”. На ім было агучана, што адным з аргументаў супраць вядзення заканадаўства па-беларуску, перакладу заканадаўчых актаў на беларускую мову з’яўляюцца "дарагоўля". Вядомы навуковец-мовазнаўца Аляксандр Лукашанец прапанаваў усе заканадаўчыя акты выдаваць па-беларуску. “І паглядзім, як хутка знойдуць грошы на пераклад на рускую мову”, — сказаў ён.
Карэспандэнт Еўрарадыё пацікавіўся, дык колькі каштуе пераклад? Дэпутат Ігар Марзалюк сказаў, што ніхто падлікамі пакуль не займаўся.