Гандлёвая палатка ў 20 метрах ад месца выбуху / Еўрарадыё
Познім вечарам 3 ліпеня падчас феерверка ў гонар Дня Незалежнасці ў Мінску ўзарваліся тры салютныя ўстаноўкі. Адна з іх стаяла ў мінскім Парку Перамогі — аскепкі ад выбуху разляцеліся на паўкіламетра і паранілі 10 чалавек. Металічны кавалак марціры трапіў у шыю 64-гадовай Наталлі Максімчук — медыкі не змаглі яе выратаваць.
Некаторы час разбураная салютная ўстаноўка заставалася на пляцоўцы ў Парку Перамогі — там працавалі следчыя. Цяпер яе няма, але шмат што на гэтым месцы па-ранейшаму нагадвае аб трагедыі. На трансфарматарным шчыце ляжаць іржавыя аскепкі. Побач — гандлёвыя павільёны з парванымі пластмасавымі сценамі. Драпіны, якія выбух пакінуў на дрэвах, замазаныя зялёнай фарбай.
На набярэжнай Свіслачы, дзе загінула Наталля Максімчук, бязлюдна. Там ляжаць жывыя кветкі.
Старшыня Следчага камітэта Іван Наскевіч агучыў асноўную версію выбухаў у Мінску — няякасныя феерверкі, якія выкарыстоўваліся падчас святочнага салюта. СК адпрацоўвае і іншыя версіі.
У Міністэрстве абароны паведамілі, што і разбураныя салютныя ўстаноўкі, і "феерверачныя вырабы" былі набытыя ў расійскага ААТ "Пиро-Росс" (г. Пасад). Здарэнне называецца "вельмі рэдкім выпадкам". Двое супрацоўнікаў "Пиро-Росс", якія знаходзіліся ў Мінску падчас падрыхтоўкі да салюта, затрыманыя.
To see this content visit the full version of this page.