Мінскі гарадскі суд пакінуў без зменаў прысуд раварысту з бітай. 11 лістапада разглядалася апеляцыя. Як паведамляла Еўрарадыё, 12 верасня Анатоль Грынкевіч быў асуджаны судом Фрунзенскага раёна за "асабліва злоснае хуліганства" на 5 гадоў пазбаўлення волі з адбыццём пакарання ў папраўчай калоніі ўзмоцненага рэжыму. Таксама ён мусіць заплаціць пацярпеламу Васілю Дземідовічу 10 тысяч рублёў, як кампенсацыю маральнай шкоды.
Здарэнне адбылося ў чэрвені. Грынкевіч ехаў на ровары па веладарожцы ўздоўж вуліцы Прытыцкага ў Мінску. Насустрач яму па веладарожцы ішоў Дземідовіч. Адбылося сутыкненне, Грынкевіч упаў. Ён дастаў з заплечніка біту і нанёс удар Дземідовічу па галаве, пасля чаго паехаў далей. Яго знайшла міліцыя. Траўму Дземідовіча прызналі менш цяжкімі цялеснымі пашкоджаннямі. У той час, калі раварыст знаходзіўся за кратамі, у яго нарадзілася дзіця.
Жонка Анатоля Грынкевіча Валерыя ў каментары Еўрарадыё кажа пра прадузятасць суда:
"Нічым не скончылася [апеляцыя], пакінулі ўсё тое ж самае. Перадузятае стаўленне было на судзе — значыць, у іх [тых, хто разглядаў апеляцыю] такое ж перадузятае стаўленне, як і ў папярэдніх".
Паводле яе слоў, яна пакуль не ведае, ці будзе падаваць чарговую апеляцыю. Увечары яна параіцца з адвакатам.