“Залаты бусел”. Праўладны Саюз кінематаграфістаў хоча падмяць усю кінадустрыю

Чытаць болей: Кіраўніком Саюза кінематаграфістаў стаў прадзюсар з атачэння Віктара Лукашэнкі

Фінансаваць усю гэтую працу будзе, відаць, Банк развіцця, які пасля пачатку поўнамаштабнай вайны трапіў пад санкцыі Украіны, Еўрасаюза, Канады, Японіі і г.д. З яго кіраўніцтвам Арандарэвіч і Кобзеў сустракаліся ў канцы чэрвеня.

“Адбылася вельмі дзелавая і адкрытая размова, у рамках якой выбудаваныя ўзаемаадносіны, якія маюць вялікую прадуктыўную будучыню!” — расказвае Кобзеў. 
 

“Стаім з выцягнутай рукой”

Мяркуючы з анансаваных праектаў, кіраўніцтва БСК нацэлілася цалкам перарабіць кінавытворчасць краіны, якая не першае дзесяцігоддзе ў стагнацыі. Вось толькі гэта не першыя спробы рэфармаваць беларускае кіно ва ўмовах аўтарытарнага рэжыму. Усе мінулыя нічым добрым не скончыліся.

Вось як ініцыятывы кіраўніцтва БСК пракаментаваў адзін з уплывовых прадстаўнікоў беларускага кіно, які пажадаў не раскрываць сваё імя з меркаванняў бяспекі.

“Усё гэта другаснае. Усё ўжо было — і анлайн-платформа, <...> і ў першым дэкрэце пра дзяржаўна-прыватнае партнёрства, калі быў [міністрам культуры Павел] Латушка, была прапісана такая магчымасць для кампаній або прадзюсараў браць крэдыты на кіно. І што? Усё ідзе па коле. Нічога новага няма”.

Эксперт лічыць, што грошы на кіно трэба вылучаць бясплатна, як гэта робіць Расія, 

“Няхай невялікія, на праект — па 100-200 тысяч долараў. Можа, тады кіно з'явіцца. Але пытанне — дзе ўзяць? Ізноў нічога новага. Адлічэнні ад мабільных аператараў (ва ўсіх ёсць свае "кіназалы" і "тэлевізары"), ад “Белтэлекама” (манапаліст са сваім тэлебачаннем і асобнымі каналамі), ад білетаў у кіно, ад тэлеканалаў. І менавіта гэтыя грошы адпраўляць на кіно. І павер — гэтых адлічэнняў хопіць на ўсіх. Не будуць ведаць, куды інвеставаць”, — кажа суразмоўца.  

Не верыць эксперт і ў партнёрскія адносіны паміж беларускім і расійскім кіно на дзяржаўным узроўні, пра якія так шмат разважае кіраўніцтва БСК, “Беларусьфільма” і Мінкульта.

Чытаць болей: Звольненае кіраўніцтва “Летапіса” — дакументальнай студыі “Беларусьфільма”

“Пра якое партнёрства ідзе гаворка? У каго ёсць грошы, той і замаўляе музыку. Мы заўсёды будзем прыдаткам, бо стаім з выцягнутай рукой. Самі не здымаем, ёсць кадравы голад, Мы нават на заканадаўчым узроўні не можам вырашыць пытанне пра рэбейты [сістэма вяртання прадзюсару фільма часткі выдаткаваных на здымкі сродкаў на тэрыторыі той ці іншай краіны. — Еўрарадыё]”.

Іншы ананімны эксперт з кінаасяроддзя кажа, што ініцыятывы новага кіраўніцтва БСК былі чаканымі.

“Улічваючы, што Віктар Васільеў [былы кіраўнік Саюза. — Еўрарадыё] вельмі доўга займаў пасаду старшыні БСК, безумоўна, замена кіраўніка на прадзюсара-практыка будзе адчувальнай. Прынамсі, варта чакаць росту актыўнасці, прадстаўленасці на розных пляцоўках, у тым ліку ў краінах СНД. Улічваючы персанальныя сувязі з уладамі, думаю, што ў яго будзе магчымасць атрымліваць фінансаванне на свае ініцыятывы. Калі Банк развіцця будзе ў гэтай схеме, дык відавочна не таму, што ўбачыць у гэтым фінансавыя далягляды”.

Магчыма, цяпер БСК возьме на сябе тую частку працы, якая для “Беларусьфільма” была залішняй: удзел у канферэнцыях, дыскусіі ў краінах СНД, прыцягненне новых партнёраў. 

“І думаю, што, магчыма, яны змогуць атрымліваць нейкае фінансаванне на гэта з бюджэту. Але новае кіраўніцтва таксама будзе карыстацца магчымасцю і сувязямі, каб прыцягваць сродкі з прыватнага сектара.

Думаю, што з улікам сувязяў Арандарэвіча ў Расіі можна чакаць актывізацыі пошуку дзяржаўнага фінансавання і адтуль. Але не варта чакаць, што новы фестываль будзе больш паспяховы, чым “Лістапад”. Хутчэй, ён будзе прыгажэй запакаваны. Не варта чакаць і таго, што платформа з фільмамі будзе карыстацца вялікай папулярнасцю”.

Суразмоўца не лічыць, што новае кіраўніцтва БСК імкнецца наўпрост канкураваць з “Беларусьфільмам”.

“[Канкурэнцыя будзе] хутчэй за размеркаванне абавязкаў, улічваючы, што мінулы кіраўнік студыі [Уладзімір] Карачэўскі хацеў займацца і распрацоўкай праграм рэбейтаў, і стварэннем платформаў, і г.д.

Актывізацыя чаканая. Але гэта хутчэй актывізацыя, каб паказаць альтэрнатыву заходняму рынку, тым фэстам і ініцыятывам, якія раней існавалі”.

Агулам эксперт лічыць, што захады БСК не зробяць беларускае кіно прыбытковым. А новае кіраўніцтва саюза марыць і пра гэта.