Валожынскі райаддзел Следчага камітэта пачаў крымінальную справу за здзек над брацкай магілай каля пасёлка Івянец.
Пра здарэнне стала вядома ў суботу, 21 траўня. Тады ў міліцыю паступіла паведамленне, што невядомыя пашкодзілі помнік на брацкай магіле жыхарам, расстраляным у часы Другой сусветнай вайны. Выявілася, што вандалы пашкодзілі пліту на пахаванні 800 габрэяў з гета Налібоцкага краю.
Як паведамляе прэс-служба Следчага камітэта, следча-аператыўная група, якая прыбыла на месца здарэння, правяла пільны агляд месца, выявіла і канфіскавала рэчавыя доказы. Следчыя пачалі крымінальную справу за здзек з брацкай магілы (ч.2 арт.347 КК).
Цяпер следчыя шукаюць сведкаў, прызначаныя экспертныя даследаванні. Высвятляюцца асобы, датычныя да здзяйснення супрацьпраўных дзей.