Якія могуць быць “пытанні ў службаў” да Усава і Краўцова? Спыталі ў іх

Чытаць болей: Фонд BYSOL атрымаў 99 заявак ад нядаўна вызваленых палітвязняў

У каго на руках быў гэты спіс? Атрымліваецца, што там дзясяткі людзей з іх асабістымі дадзенымі, якія па ўсіх заканадаўствах забаронена распаўсюджваць і перадаваць у трэція рукі без згоды.

Адкуль узяўся спіс? Як я ў гэты спіс патрапіў? Ну і адкуль узялася інфармацыя пра тое, што польскія службы, якія на пачатку артыкула “Нашай нівы” былі пазначаны як “спецслужбы”, мяне выкраслілі? І калі гэта нібы здарылася, то як гэта інфармацыя патрапіла ў крыніцы, якія да гэтага не маюць дачынення? То-бок гэта мэтанакіраваная правакацыя.

Павел Усаў схіляецца менавіта да гэтага варыянта. Таксама ён лічыць, што ў спісе магла быць скажоная інфармацыя адносна яго асабістых дадзеных.

— У мяне абсалютна новыя дакументы, і ніхто не прасіў іх пацвярджаць. Раней я трапляў на сустрэчы з прэзідэнтам Польшчы некалькі разоў пасля праверкі маіх дадзеных з боку польскіх структур. Ну а цяпер магла быць створана сітуацыя, калі былі пададзены няспраўджаныя дадзеныя адмыслова. Потым гэтая інфармацыя зліваецца ў СМІ для стварэння негатыўнай атмасферы, што і было зроблена ў дачыненні да мяне.

Павел Усаў кажа, што, згодна з яго крыніцамі, канчатковую версію спіса складаў Офіс Святланы Ціханоўскай, а менавіта — Дзяніс Кучынскі.

Палітолаг адзначыў, што дакладна не ведае, адкуль у Офіса з’явіліся яго дадзеныя, але будзе спрабаваць высвятляць.

Чытаць болей: Баранавіцкі актывіст, які вярнуўся ў Беларусь, зняўся ў прапагандысцкім фільме

На яго думку, сапраўдных пытанняў наконт бяспекі з польскага боку не павінна было ўзнікнуць. Са слоў Паўла Усава, ён жыве ў Польшчы больш за 20 год на падставе сталага пражывання і ў мінулыя гады без праблем запрашаўся на сустрэчы з прэзідэнтам Польшчы Анджэем Дудай. І калі б былі пытанні з бяспекай, то былі б праблемы з тым, каб ён мог і далей знаходзіцца на тэрыторыі Польшчы.

"Сцвярджэнні, што хтосьці кагосьці “выкрасліў”, мякка кажучы, не адпавядаюць рэчаіснасці"

Дарадца Святланы Ціханоўскай Франак Вячорка пасля пачатку скандалу напісаў у Фэйсбуку, што падрыхтоўкай прыёмаў у польскага прэзідэнта займаецца прадстаўніцтва па нацыянальным адраджэнні Аб’яднанага пераходнага кабінета, а спісы гасцей фарміруюцца супольна польскім і беларускім бакамі.

— Спісы гасцей фарміруюцца супольна польскім і беларускім бакамі. Няпростая задача беларускага боку — зрабіць спіс інклюзіўным, захаваць баланс і прадстаўніцтва, не пакрыўдзіць нікога і разам з тым даць магчымасць трапіць на прыём новым людзям”, — напісаў ён.

Дарадца Святланы Ціханоўскай адзначыў, што сёлета колькасць месцаў на прыёме істотна скарацілася і што адсутнасць запрашэння не азначае, што хтосьці больш ці менш важны.

— Канчатковае рашэнне па спісе ўдзельнікаў застаецца за польскім бокам. Прапановы з беларускага боку далёка не заўсёды прымаюцца. У мінулыя гады мы, напрыклад, спрабавалі запрасіць некаторых прадстаўнікоў Офіса, але атрымлівалі адмову. Таму сцвярджэнні, што хтосьці кагосьці “выкрасліў”, мякка кажучы, не адпавядаюць рэчаіснасці.

Акрамя таго, пасля ўзгаднення спісаў усімі інстытуцыямі адбываецца праверка польскімі службамі бяспекі, што таксама скарачае колькасць запрошаных, — рэзюмаваў Франак Вячорка.