Еўрапейскі парламент / europarl.europa.eu
Віцэ-прэзідэнтка Еўрапарламента, дэпутатка ад Грэцыі Ева Кайлі адмаўляе сваю датычнасць да карупцыйнага скандалу ў Еўрапарламенце, піша ВВС.
Кайлі — адна з затрыманых у рамках расследавання карупцыйнага скандалу ў Еўрапарламенце. Чатырох палітыкаў падазраюць у хабарніцтве.
Следства мяркуе, што неназваная дзяржава Персідскага заліва на працягу некалькіх месяцаў уплывала на эканамічныя і палітычныя рашэнні Еўрапарламента. СМІ пішуць, што хабар спрабаваў перадаваць Катар. Аднак прадстаўнік урада Катара ў каментары AFP адмаўляе абвінавачванні.
На гэтым тыдні на разгляд дэпутатаў Еўрапарламента мусілі вынесці рэкамендацыю адносна дазволу бязвізавага ўезду для катарцаў у ЕС. Але цяпер гэтае галасаванне адклалі.
У пятніцу ў Бруселі прайшлі 16 ператрусаў. У рамках ператрусаў былі канфіскаваныя грашовыя сродкі на суму каля 600 тыс. еўра. У падазраваных таксама канфіскавалі камп'ютары і мабільныя тэлефоны.
Адвакат Кайлі не пацвярджае, але і не аспрэчвае таго, што ў яе доме таксама знайшлі буйную суму грошай наяўнымі.
"Я не ўяўляю, ці былі знойдзеныя якія-небудзь грошы і колькі іх было знойдзена", — цытуе абаронцу ВВС.
Усім чатыром падазраваным выставілі абвінавачанні ва "ўдзеле ў злачыннай арганізацыі, адмыванні грошай і карупцыі".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут