Усё з-за мульціковай мапы з пункцірнай лініяй, якую паказалі ў фільме / pixabay
В'етнам раззлавала мапа, якую паказалі ў трэйлеры “Барбі”, піша Variety. Стваральнікі фільма кажуць, яны вырашылі пункцірам намаляваць шлях гераіні ад яе жыцця ў “розом свеце” да рэальнага свету. І, маўляў, выкарысталі такую ж пункцірную лінію, якую часта малююць у дзіцячых мультфільмах, каб паказаць шлях персанажа.
Здавалася б, пры чым тут В'етнам? У кіраўніцтва краіны гэта лінія выклікала непрыемныя асацыяцыі.
Справа ў тым, што падобную пункцірную лінію выкарыстоўвае Кітай, каб пазначаць на мапе свае прэтэнзіі ў Паўднёва-Кітайскім моры. В'етнам і Кітай у гэтым рэгіёне прэтэндуюць на адны і тыя ж выспы.
“Гэтыя малюнкі — уяўнае падарожжа Барбі з “Краіны Барбі” у “рэальны свет”. Яны не прызначаліся для якіх-небудзь [палітычных] заяў”, — сказаў прадстаўнік Warner Bros. Film Group .
Стваральнікі “Барбі” звяртаюць увагу В'етнама на тое, што ў кітайскай лініі — 9 пункцірных рысак. А ў лініі ў мультыку толькі восем. Але В'етнам пакуль што не паверыў у версію студыі. Прынамсі, ліцэнзіі на паказ у В'етнаме “Барбі” пакуль гэтак і не атрымала.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут