Станіслаў Койпыш забіў “слонімскую чупакабру”, што наводзіла страх на ўсю акругу. Ці думае, што забіў менавіта яе:
"Дзесьці ў 1983-1984 гадах я такую істоту ўжо страляў, толькі звер быў худы і яшчэ больш чорны па афарбоўцы. Ён быў стары, асобна ад зграі паляваў. Гэта, напэўна, сумесь сабакі і ваўка. Такі гібрыд нават горшы, чым звычайныя ваўкі, таму што ён не баіцца людзей", — распавядае егер “Зялёнаму парталу”.
Істота урывалася па начах у падворкі і забівала хатніх жывёл, і нават разарвала адну суседскую сабаку напапалам.
Мясцовыя ўлады нават аб'явілі ўзнагароду ў 500 рублёў за галаву "чупакабры". Паляўнічыя і егеры гойсалі па навакольных лясах, вышукваючы сляды таямнічага звера, што пустошыў вясковыя двары. Але той звер, якога выдаюць за “чупакабру”, больш нагадвае буйнога сабаку.
Прадстаўнікі лабараторыі малекулярнай заалогіі пры Акадэміі навук прыехалі ў Слонім і сабралі матэрыялы для аналізаў, каб правесці генетычную экспертызу і вызначыць, кім жа быў забіты звер. Спецыялістка Акадэміі навук Аляксандра Ларчанка ўпэненая, што забіты драпежнік — не воўк:
"Ён занадта маленькі для ваўка. Магчыма, гэта помесь сабакі і ваўка, можа, нават не ў першым пакаленні. Адназначна немагчыма сказаць, трэба ўлічваць, што сабакі і ваўкі добра скрыжоўваюцца", — тлумачыць спецыялістка "Газеце Слонімскай".
Журналісты знайшлі гаспадара забітай “чупакабры”. Гэта жыхар вёскі Дзераўная Генадзь Альбертавіч. Уночы з 26 на 27 верасня ён выпусціў сабаку пагуляць, а той не вярнулася. У тым, што гэта яго сабака, ён пераканаўся, убачыўшы фатаграфіі забітага звера.
Сабаку клікалі Балта, ён пражыў у Генадзя Альбертавіча дзесяць гадоў.
Гэта не ў першы раз, калі ў Слонімскім раёне заўважалі "чупакабру". У 2012 годзе гэты раён таксама тэрарызавала невядомая містычная істота. Але тады, пасля некалькіх нападаў, яна знікла. Мясцовыя ўлады палічылі, што гэта былі выхадкі рысі, якая згаладалася.