Аварыя на нафтаправодзе адбылася за 70 кіламетраў ад польскага горада Плоцк / rmf24.pl
Напярэдадні ўвечары за 70 км ад горада Плоцк у Польшчы адбылася аварыя на нафтаправодзе. "Прычыны інцыдэнту не вядомыя, прапампоўка ў пашкоджаным трубаправодзе неадкладна адключаная. Другая лінія трубаправода працуе без зменаў", — гаворыцца ў паведамленні польскага аператара трубаправода "Дружба".
Пашкоджанне адбылося на магістралі, па якой сырая нафта паступае ў Германію. Як запэўнівае аператар, астатнія элементы інфраструктуры працуюць у штатным рэжыме. У тым ліку Памяранскі ўчастак, па якім сырая нафта танкерамі транспартуецца ў Польшчу, а затым і ў Германію.
Уцечка нафты адбылася на кукурузным полі, якое часткова належыць жывёлагадоўчаму комплексу, паведамляе польскае выданне RMF FM. Разлітую нафту збіраюць у тры цыстэрны. Да вечара наступствы аварыі разлічваюць ліквідаваць.
Пашкоджаны трубаправод пастаўляе сырую нафту з Расіі на нафтаперапрацоўчы завод у Плоцку. Затым сыравіна па трубаправодзе перанакіроўваецца на буйныя нафтаперапрацоўчыя заводы ва ўсходняй Германіі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут