Бацькам пагражаюць СНС: як абараніцца ад ціску школы. Парады юрыста

Чытаць болей: Детей “тунеядцев” начнут ставить в СОП. Чего хочет добиться режим?

— Можна задаваць пытанні, чытаць дакументы. Абавязкова трэба ўважліва вывучыць Акт абследавання жыллёвых умоў. Калі трэба — прасіць унесці туды дадатковую інфармацыю. Калі з чымсьці нязгодныя — зрабіць запіс аб нязгодзе і паставіць дату і подпіс.

Дзмітрый кажа, што на Савет прафілактыкі можна ісці з адвакатам, хоць будзе дастаткова проста сабраць неабходныя дакументы, якія пацвярджаюць адсутнасць паказчыкаў для прызнання дзіцяці ў стане СНС — усе пярэчанні лепш падаваць у пісьмовым выглядзе і прасіць іх далучыць да матэрыялаў.

На думку юрыста, бацькі не павінны баяцца ўдзельнічаць у працэсах, якія тычацца іх дзяцей — у іх ёсць мноства правоў, пра якія яны могуць проста не ведаць.

— Знізіць трывогу і атрымаць інфармацыю дапамогуць кансультацыі з юрыстамі або з бацькамі, якія ўжо ўдзельнічалі ў такіх мерапрыемствах. Можна пашукаць інфармацыю ў інтэрнэце, яшчэ вельмі важна спыняць любыя пагрозы з боку педагагічных работнікаў. Пагрозы — гэта проста жаданне дамагчыся патрэбных паводзін ад дзіцяці або бацькоў.

"Вельмі важна як мага хутчэй займаць актыўную пазіцыю"

На самой справе многія бацькі дарма асцерагаюцца наступстваў гэтых працэдур, запэўнівае Дзмітрый. Іншае пытанне, што зараз СНС выкарыстоўваецца як пагроза.

Часта ў такія сітуацыі трапляюць добра уладкаваныя сем'і: цераз школьныя канфлікты ці, напрыклад, супрацьстаянне з адміністрацыяй па палітычных пытаннях.

Суразмоўца падкрэслівае, што рэкамендацыі па кейсах, дзе ёсць палітычны складнік, адрозніваюцца ад стандартных.

— Калі па іншых працэдура абскарджання часцей за ўсё прыносіць вынік, то ў кейсах з палітычнай падаплёкай прававыя і псіхалагічныя інструменты нічога не даюць. Ціск на актыўных бацькоў праз пагрозу адабрання дзяцей ужываўся і раней. Але пасля 2020 года спробы канфіскацыі дзяцей без дастатковых на тое прававых падстаў сталі сустракацца нашмат часцей.

Чытаць болей: В Беларуси изменили условия, когда ребенка могут признать находящимся в СОП

Дзмітрый кажа, што лепш за ўсё абараніць дзіця на больш ранніх этапах, чым абскарджваць ужо вынесенае рашэнне Каардынацыйнага савета.

— Вельмі важна як мага хутчэй заняць актыўную пазіцыю, а не чакаць, што вырашыць школа. Звяртацца па дапамогу да адвакатаў, знаёмых юрыстаў, шукаць падтрымку ў аднадумцаў.

Не даводзіць да горшага

Паводле спецыяліста, кейсаў, калі дзіця несправядліва хочуць паставіць на СНС, шмат. Большасць з іх стандартныя, і для іх вырашэння бацькам дастаткова проста выступіць на Савеце прафілактыкі. Але ёсць і нюансы.

— Ёсць выпадкі, калі, напрыклад, муж ці жонка пачынае ініцыяваць сацыяльнае расследаванне ў дачыненні да свайго дзіцяці і былога мужа/жонкі. Яшчэ бываюць сітуацыі, калі пры відочным дабрабыце бацькоў высвятляецца, што дзіця ў сям'і падвяргаецца гвалту, ці калі ў сем'ях дзіця шматразова прызнавалася ў стане СНС, а потым рашэнне адмянялі. Бывалі нават выпадкі, калі бацькам даводзілася з'язджаць з краіны ў сувязі з тым, што для дзяцей існавала пагроза канфіскацыі з сям'і па надуманых прычынах "па распараджэнні зверху".

У любым выпадку, Дзмітрый нагадвае, што ў бацькоў ёсць правы і іх трэба адстойваць. Важна рэагаваць адразу, каб не даводзіць сітуацыю да горшага.