JamNews
Канстытуцыйны суд Грузіі падтрымаў дэкрыміналізацыю марыхуаны. Суд палічыў неканстытуцыйным ўзбуджэнне крымінальнай справы за ўжыванне марыхуаны і паведаміў, што лічыць неабходным скасаваць такую практыку:
“Любы чалавек мае права выбіраць сабе спосаб расслабіцца, у тым ліку з дапамогай марыхуаны, паколькі гэта з'яўляецца асабістай, абароненай сферай жыцця чалавека”.
Гэта рашэнне ўжо называюць рэвалюцыйным. Да гэтага часу грузінскае заканадаўства за паўторнае і наступныя ўжывання марыхуаны прадугледжвала крымінальнае пакаранне (а за парушэнне закона ў першы раз прадугледжвалася адміністрацыйнае пакаранне).
Сваё рашэнне канстытуцыйны суд вынес на падставе пазову грамадзяніна Грузіі Гіві Шанідзэ. За паўторнае спажыванне марыхуаны супраць Гіві Шанідзэ была ўзбуджаная крымінальная справа. Пры падтрымцы палітычнага аб'яднання “Гірчы” (“Шышка”) ён падаў скаргу ў канстытуцыйны суд — апратэставаў 273 артыкул Крымінальнага кодэкса, згодна з якім ужыванне марыхуаны без “прызначэння лекара” з'яўляецца каральным.
Наркапалітыка ў Грузіі — адна з самых рэпрэсіўных, і змены яе ўжо шмат гадоў патрабуюць грамадскія арганізацыі і актывісты.
Дзясятага чэрвеня 2017 года на праспекце Руставэлі адбылася адна з самых шматлікіх акцый пратэсту, якія праходзілі ў Тбілісі за апошнія некалькі гадоў. Яе ўдзельнікі патрабавалі ад уладаў змяніць наркапалітыку.
Паводле справаздачы Савета Еўропы ад 2015 года, у Грузіі кожны трэці зняволены адбывае пакаранне за нарказлачынства. У агульнай суме ўтрыманне ў турмах асуджаных за нарказлачынствы абыходзіцца дзяржаве прыкладна ў 40 мільёнаў долараў. У той жа час міністэрства аховы здароўя на лячэнне ад нарказалежнасці і замяшчальную тэрапію выдаткоўвае 4,1 мільёна долараў.
Паводле звестак МУС, у 2015 годзе 36503 чалавекі былі пратэставаныя на ўжыванне наркотыкаў. Толькі на іх аналізы мачы з бюджэту было выдаткавана больш за 15 мільёнаў лары.
Улады Грузіі часта чуюць абвінавачванні ў тым, што жорсткая наркапалітыка становіцца прыладай барацьбы супраць апазіцыі, а таксама прыкметнай крыніцай папаўнення бюджэту. На думку экспертаў, менавіта таму ў Грузіі не спяшаюцца з лібералізацыяй заканадаўства. (У 2009-2012 гадах толькі аплата адміністрацыйных парушэнняў узбагаціла бюджэт больш чым на 13 мільёнаў лары. А ў 2013-2014 гадах дзяржава такім шляхам атрымала 11,1 мільёна лары).
Насельніцтва ў цэлым выступае за змякчэнне наркапалітыкі. Даследаванне, праведзенае арганізацыяй "Альтэрнатыва Джорджыі", выявіла, што:
69 адсоткаў насельніцтва выступаюць за дэкрыміналізацыю марыхуаны; 38 адсоткаў лічаць, што за курэнне марыхуаны нават адміністрацыйных штрафаў не павінна быць; 54 адсоткі насельніцтва лічыць, што і ін'екцыйная наркаманія не павiнна выклікаць крымінальнае пакаранне, і адпаведны артыкул неабходна адмяніць; 25,1 адсотка апытаных займаюць супрацьлеглую пазіцыю.
Паводле таго ж даследавання, 70 адсоткаў апытаных не лічаць нарказалежных людзей злачынцамі і выступаюць за іх лячэнне, а не турэмнае зняволенне.