Старшыня Чавускага райвыканкама Сяргей Драздоўскі атрымаў медаль "За выратаванае жыццё". У студзені чыноўнік разам з участковым міліцыянтам выратаваў чалавека на пажары.
24 студзеня ў вёсцы Галузы гарэў жылы дом і два хлявы. Драздоўскі, які знаходзіўся ў суседняй вёсцы, пабачыў дым, паведаміў пра здарэнне і паехаў на месца. Туды ж прыехаў участковы міліцыянт Аляксандр Барсукоў, які быў у іншай вёсцы.
Яшчэ да прыбыцця ратавальнікаў Драздоўскі і Барсукоў вывелі з дома, які гарэў, гаспадара — самастойна выйсці ён не мог. Мужчына не пацярпеў, аднак яго шпіталізавалі з гіпертанічным крызам.
4 ліпеня Сяргей Драздоўскі атрымаў медаль "За выратаванае жыццё". Разам з ім Аляксандр Лукашэнка ўзнагародзіў такім жа медалём Аляксандра Барсукова.
Цікава, што ў той жа дзень з рук Лукашэнкі атрымаў узнагароду і яшчэ адзін Аляксандр Барсукоў — кіраўнік мінскай міліцыі. Яму дастаўся медаль "За службу Радзіме" II ступені.