Сяргей Баранаў / Белпол, з базы ІС "Пашпарт"
Сталі вядомыя дэталі біяграфіі шпіёна беларускага ГРУ, які працуе на латвійскім напрамку. Напярэдадні латвійская разведка назвала яго імя — Сяргей Баранаў. Больш пра яго паспрабавала даведацца "Наша Ніва" з дапамогай Belpol.
Баранаву 42 гады. Ён нарадзіўся ў нямецкім Лейпцыгу, паходзіць з сям'і савецкіх вайскоўцаў. Ягоная маці — вайсковая пенсіянерка.
Вядома, што ў дзяцінстве Баранаў жыў у Віцебску, дзе скончыў мясцовы ліцэй. У 2005 годзе ён скончыў Беларускі нацыянальны тэхнічны ўніверсітэт.
Пасля ўніверсітэта Баранаў праходзіў службу ў часці №97030 у Барысаве, дзе даслужыўся да намесніка начальніка штаба. Потым ён перайшоў на службу ў вайсковую часць №51886, якая цяпер мае нумар 11709. Як казаў былы супрацоўнік "Байпол" Алег Талерчык, гэта самае закрытае падраздзяленне — дзявятае ўпраўленне ГРУ. На яго базе ў 2014 годзе было створанае дыверсійнае спецпадраздзяленне для працы за мяжой.
Паведамляецца, што Баранаў не раз бываў у Расіі. Напрыклад, 12 чэрвеня 2017‑га і 29 траўня 2019‑га ён рэгістраваў сім-карты ў Маскве на сваё імя. У 2014 годзе мужчына наведваў акупаваны Крым: фота адтуль з'явіліся ў яго сацсетках.
У Латвію Баранаў выязджаў з Беларусі як мінімум двойчы, кожны раз — цягніком праз Бігосава. Згодна з данымі аб перасячэнні мяжы, гэта было з 18 да 24 жніўня 2014-га і з 18 да 23 ліпеня 2015-га. Абедзве паездкі ён пазначаў як прыватныя.
У спісах яго сяброў у сацсетках палова людзей з Расіі і траціна з Украіны ці акупаваных тэрыторый. Мінімум трое з яго інтэрнэт-сяброў паходзяць з Латвіі.
Латвійская разведка мяркуе, што ГРУ вярбуе агентаў для збору разведданых і шукае іншых агентаў. Па звестках службы, Сяргей працуе менавіта на гэтым кірунку. Таксама латвійская разведка адзначала, што беларускія спецслужбы фактычна сталі філіяй расійскіх.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут