Паліна Шарэнда-Панасюк / svaboda.org
Да палітзняволенай Паліны Шарэнда-Панасюк у Гомельскім СІЗА не даходзяць перадачы ад сваякоў. Прычыну гэтага высветліў яе муж Андрэй пасля сённяшнага візіту адваката да Паліны.
У гутарцы з Радыё "Свабода" Андрэй расказаў, што 1 верасня яго жолнка атрымала вельмі дзіўную прадуктовую перадачу.
"Гэта было 1 верасня. Перадачы пачынаюць прымаць у 8:30, а ўжо ў 9:00 ёй у камеру прынеслі мех яблык. Пазначана прозвішча, якога яна не ведае. Яблыкі пабітыя, нібы сабраныя каля дарогі. Мех стары, з дзяругі, у такім звычайна захоўваюць бульбу. І вага — дакладна 30 кілаграмаў. Якраз столькі, колькі даецца на месяц для перадач ад сваякоў. Ад тых яблык Паліна адмовілася, іх выкінулі ў сметніцу. Але фармальна ў верасні на перадачы яна ўжо не можа разлічваць, бо ліміт вычарпаны", — расказаў падрабязнасці Андрэй Шарэнда. Ён мяркуе, што гэтая перадача — спецыяльная аперацыя, каб пазбавіць Паліну прадуктовых перадач, неабходных ёй пасля працяглай галадоўкі.
На думку Андрэя Шарэнды, гэткім чынам яго жонку спрабуюць псіхалагічна зламаць перад будучым судом: яе будуць судзіць па абвінавачанні ў злосным непадпарадкаванні адміністрацыі калоніі.
Паліну Шарэнду-Панасюк з Брэста асудзілі ў 2021 годзе на 2 гады зняволення за абразу Лукашэнкі і гвалт супраць міліцыянта. У 2022-м ёй дадалі яшчэ год калоніі, абвінаваціўшы ў непадпарадкаванні адміністрацыі. Сёлета ў красавіку на Паліну зноў пачалі крымінальную справу па тым жа абвінавачанні. Улетку стала вядома, што яна адмовілася ад беларускага грамадзянства на знак пратэсту супраць пераследу.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут