Дзяніс Урбановіч / t.me/dzianisurbanovich/
Байцы батальёна "Волат" беларускага палка Каліноўскага працягваюць удзельнічаць у баях пад Бахмутам ва Украіне. Пра гэта racyja.com распавёў добраахвотнік Дзяніс Урбановіч ("Ваўкалак"). Паводле яго слоў, на ўчастку фронту, дзе знаходзіцца "Волат", расіяне адступаюць.
"Каля трох-чатырох кіламетраў мы прасунуліся наперад разам з "Азовам" [з 3-й асобнай штурмавой брыгадай]..., — распавядае Урбановіч. — Яны адстрэльваюцца, але наступу з боку маскалёў няма... Украінцы наступаюць, марудна, але прасоўваюцца наперад... Мы прымаем любую баявую задачу і выконваем яе на ўсе 100%, аддаючы ўсе сілы".
У Беларусі Дзяніс Урбановіч кіраваў "Маладым фронтам". Падчас рэпрэсій быў вымушаны выехаць за мяжу, ваюе з расійскімі акупантамі ўжо амаль паўтара года, шмат разоў быў паранены. У сакавіку сёлета Рада БНР узнагародзіла яго медалём "За баявыя заслугі".
Нядаўна загінулі баец батальёна "Волат" і трое байцоў з батальёна "Літвін" (ён ваюе на іншым накірунку). "Вельмі шкада", — кажа Урбановіч. "Самае галоўнае — не губляць надзею", — дадае ён. Добраахвотнік верыць, што Расія прайграе вайну, а падраздзяленні беларускіх добраахвотнікаў ва Украіне, якія маюць баявы досвед, у будучыні могуць стаць "прафесійным беларускім незалежніцкім войскам, якое выступіць на абарону Беларусі".
To see this content visit the full version of this page.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут