Байцы на "Азоўсталі" ў траўні / instagram.com/kztsky
Каля дзвюх тысяч абаронцаў "Азоўсталі" знаходзяцца ў палоне ў расійскіх вайскоўцаў і сепаратыстаў з так званых "ДНР" і "ЛНР". Пакуль што толькі 95 з іх вярнуліся ва Украіну ў межах абмену палоннымі — тыя, хто меў самыя цяжкія раненні.
Адзін з байцоў — Дзяніс з пазыўным "Манга". Ён служыць у "Азове", абараняў Марыупаль, дзе страціў руку. У палоне яго вывезлі на тэрыторыю калоніі ў Аленаўцы.
"Я быў сведкам, калі там білі хлопцаў. Нас выганялі на так званы "ператрус", раздзявалі дагала, прымушалі прысядаць. Хто падымаў галаву — адразу пачыналі біць. Мяне таксама білі, падчас допытаў — хацелі, каб я падпісаў паказанні супраць свайго камандавання", — расказаў на прэс-канферэнцыі Дзяніс.
Па словах вайскоўца, расіяне хацелі атрымаць паказанні супраць камандавання "Азова": каб салдаты "звалілі" ўсе разбурэнні і ахвяры ў Марыупалі на ўласных камандзіраў.
"Я казаў, што не буду гэта рабіць, яны пачыналі мяне біць палкамі. Былі пагрозы расстрэлам... бачыў, як хлопцаў з нашага барака забіралі на два-тры дні, потым іх прыносілі збітых, у вельмі цяжкім стане", — сказаў Дзяніс.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут