Участак для галасавання / spring96.org
Выбарчы працэс падчас сёлетняй прэзідэнцкай кампаніі ў Беларусі не адпавядаў шэрагу міжнародных стандартаў і суправаджаўся шматлікімі парушэннямі на ўсіх этапах. Такая выснова ўтрымліваецца ў выніковай аналітычным справаздачы, якую апублікавала кампанія незалежнага назірання "Праваабаронцы за свабодныя выбары".
Праваабаронцы нагадваюць пра выключэнне з перадвыбарнай гонкі папулярных кандыдатаў і пра тое, што ўлада актыўна карысталася адміністрацыйным рэсурсам. Кандыдаты не мелі роўнага доступу да СМІ, а выбарчыя камісіі складана назваць бесстароннімі. Былі адзначаныя шматлікія факты прымусу выбаршчыкаў да датэрміновага галасавання і нядопуск назіральнікаў на ўчасткі.
Незалежнае назіранне за ходам галасавання і падлікам галасоў практычна аказалася сарванае праз рашэнне ЦВК абмежаваць, спаслаўшыся на пандэмію, колькасць назіральнікаў на ўчастках.
"Гэтыя важныя этапы выбарчай кампаніі прайшлі цалкам непразрыста", — адзначаецца ў справаздачы.
Усе гэтыя факты з'яўляюцца істотнымі парушэннямі нацыянальнага заканадаўства і асноватворных прынцыпаў правядзення справядлівых і дэмакратычных выбараў.
Колькасць гэтых істотных парушэнняў, "у тым ліку пазбаўленне назіральнікаў магчымасці бачыць падлік вынікаў галасавання, не дае падставаў давяраць вынікам выбараў, агучаным ЦВК, і лічыць, што яны адлюстроўваюць рэальнае волевыяўленне грамадзян Рэспублікі Беларусь", гаворыцца ў справаздачы праваабаронцаў.
Раней з аглядкай на гэтыя ж парушэнні вынікі беларускіх выбараў прэзідэнта не прызналі краіны ЕС і ЗША. Прызналі вынікі беларускіх выбараў толькі ў краінах СНД, а таксама ў Венесуэле, В'етнаме, на Кубе, у Нікарагуа, Сірыі і Турцыі. Акрамя таго, Аляксандра Лукашэнку з перамогай віншавалі кіраўнікі Расіі і Кітая.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.