Прэзідэнт Украіны Пётр Парашэнка падтрымаў прапанову Ваеннага камітэта пра ўвядзенне ваеннага становішча. Нагодай стаў напад расіян на ўкраінскія караблі каля Керчанскага праліва. Заява Парашэнкі прагучала падчас пасяджэння Савета нацыянальнай бяспекі і абароны, перадае hromadske.ua.
Цяпер прапанову пра ўвядзенне ваеннага становішча павінная разгледзець Вярхоўная Рада. Яе экстраннае пасяджэнне пройдзе 26 лістапада ў закрытым рэжыме.
Парашэнка падкрэсліў, што ваеннае становішча не азначае, быццам Украіна пачне наступальныя аперацыі — Узброеныя сілы будуць толькі абараняць сваю тэрыторыю. Таксама не зменіцца становішча на лініі судакранання ў Данбасе і на іншых участках. Неадкладнай мабілізацыі не плануецца — Парашэнка заклікаў быць напагатове толькі рэзервам першай чаргі.
Па словах украінскага прэзідэнта, канстытуцыйныя правы і свабоды грамадзян не будуць абмежаваныя. Украіна не будзе адмаўляцца ад мірнага ўрэгулявання канфлікту з Масквой у Данбасе.
Сакратар Савет нацбяспекі Аляксандр Турчынаў паведаміў, што гэтая структура прапанавала ўвесці ваеннае становішча на 60 сутак.
Як паведамляла Еўрарадыё, 25 лістапада ўкраінскія караблі і рэйдавы буксір планава выйшлі з порта Адэсы ў порт Марыупаля. Каля Керчанскага праліву расійскі карабель пратараніу украінскі буксір і пашкодзіў яго. З экіпажа ніхто не пацярпеў.
Са свайго боку Расія заявіла, быццам ўкраінскія караблі парушылі тэрытарыяльныя вады Расіі і ўвайшлі ў закрытую акваторыю. Акрамя таго, Украіна нібыта не падала заяўку на праходжанне Керчанскага праліва.