Новым галоўным трэнерам ХК "Шахцёр" (Салігорск) стаў Уладзімір Цыплакоў, інфармуе БЕЛТА. Ён змяніў Андрэя Гусава, які кіраваў камандай ад пачатку заснавання хакейнага клуба (больш за 7 гадоў). Адзначаецца, што змены ў трэнерскім штабе адбыліся з-за няўдалага выступлення "Шахцёра" ў Кантынентальным кубку, у Кубку Салея. У чэмпіянаце Беларусі каманда займае толькі 3-е месца.
Уладзіміру Цыплакову 47 гадоў. Ён — былы вядомы беларускі хакеіст, выступаў за "Тарпеда" з Яраслаўля, за мінскае "Дынама", гуляў у НХЛ. Трэнерскую кар'еру распачаў у 2005 годзе, быў асістэнтам маладзёжнай і нацыянальнай зборных Беларусі, уваходзіў у трэнерскія штабы мінскага "Дынама", омскага "Авангарда", чарапавецкай "Северстали", а апошнім часам — чалябінскага "Трактара".