Вынікі цэнтралізаванага тэставання 2019 года падлічаць па новай методыцы. Новыя правілы 17 кастрычніка агучыў Рэспубліканскі інстытут кантролю ведаў.
Згодна з методыкай, кожнаму тэставаму заданню прысвойваецца свой бал, які абітурыент будзе ведаць загадзя. Цяпер можна не выконваць усе заданні. Дастаткова падлічыць, колькі балаў трэба, каб паступіць на запланаваны факультэт, і правільна зрабіць неабходныя заданні. Таксама нават за часткова правільны адказ у заданні можна будзе атрымаць бал. Старая методыка такога не прадугледжвала.
Якая неабходнасць у такіх зменах і што яны дадуць?
Настаўніца Ганна Севярынец лічыць новую методыку станоўчай ініцыятывай, якая дасць большую свабоду абітурыенту падчас тэставання.
“Раней кожнае заданне тэставання ацэньвалася, як яго выканалі астатнія вучні, — кажа Еўрарадыё Ганна Севярынец. — Калі большасць вучняў, напрыклад, заданне не зрабіла, за яго налічваўся максімум балаў. Цяпер кожнае заданне будзе мець канкрэтную важкасць балаў, якую абітурыенты будуць ведаць адразу. Чалавек не проста выконвае тэст і не ведае выніку, а ставіцца аналітычна да сваіх здольнасцяў. У абітурыента будзе магчымасць ацаніць сябе і спрагназаваць вынік”.
Аднак настаўніца папярэджвае, што вучні не павінны легкадумна ставіцца да новай сістэмы: “Не павінны выбраць, напрыклад, дзесяць заданняў на 60 балаў, вырашыць і пайсці, а павінны стварыць “падушку бяспекі”. Не проста матэматычна набіраць балы, а стратэгічна ўсё ўзважыць”.
Яна дапускае, што падчас падрыхтоўкі да ЦТ магчымыя нейкія маніпуляцыі з боку рэпетытараў, якія будуць рыхтаваць вучняў адразу да заданняў з максімальнай колькасцю балаў. Але карысці ад новай методыкі ўсё адно больш, лічыць Ганна Севярынец.
Рэпетытар Яўген Лівянт называе новую методыку падліку вынікаў цэнтралізаванага тэставання бессэнсоўнай і незразумелай. На яго думку, аналагічнай была і папярэдняя.
“Я ведаю мэты, для чаго гэта зроблена, — кажа Еўрарадыё Яўген Лівянт. — Упэўнены, новую методыку выпусцілі не для таго, каб зрабіць сістэму падліку вынікаў ЦТ справядлівай і зразумелай. Любой цаной трэба падняць сярэдні бал на цэнтралізаваным тэставанні. Нейкі міфічны сярэдні бал... Каб можна было сказаць, што ў нас сярэдні бал па фізіцы не 18, а 40. Па матэматыцы — не 25, а 50. І думаю, што такія балы ўжо падрыхтаваныя на 2019 год і далей.
Таксама паднімуцца і прахадныя балы. Гэта значыць, не так будзе сорамна сказаць, што прахадны бал на падагагічны факультэт у нас не 100, як цяпер, а 250-300 балаў”.
Лівянт дадае, што ўсё роўна трэба вучыцца і атрымліваць адукацыю. На абітурыентаў, на думку рэпетытара, новыя правілы вынікаў падліку ЦТ не паўплываюць, бо і старая, і новая сістэмы для іх незразумелыя.