“Прадстаўляючы сваю краіну на міжнародных спаборніцтвах, Вы не толькі несяце адказнасць, але і можаце карыстацца дадатковымі перавагамі сваёй нацыі”, — нечакана пачынаюцца “Рэкамендацыі” РНПЦ спорту.
Першае, што, адкрые другое дыханне нашым алімпійцам — гэта разуменне, што “з імі ўся краіна”. Наступная перавага — асаблівая беларуская цярплівасць.
“Так, мы церпім доўга многае, і ў гэтым наша сіла!!! Калі іншыя не вытрымаюць — мы пераадолеем!”
Далей пра спакой, міралюбнасць і высокую працаздольнасць, якімі вылучаюцца беларусы.
Перад вылетам спарстменам раяць прайсці вакцынацыю ад гепатыту, ліхаманкі і малярыі.
За 1-2 дні да да пасадкі ў самалёт трэба адмовіцца ад алкаголю, гарбаты, кавы, цяжкай ежы. Да таго ж варта добра выспацца і перавесці гадзіннік на бразільскі час.
Падчас палёту алімпійцам раяць заснуць. У гэтым дапамогуць супакойваючыя прэпараты, бірушы ў вушы, пледы, павязкі на вочы. Не спіцца — глядзіце відэа і слухайце музыку.
“Для высакарослых спартсменаў аптымальныя дзіцячыя рэзерваваныя месцы (замаўляюцца падчас рэгістрацыі на рэйс) у пачатку салона і бізнес-класе”, — сказана ў “Рэкамендацыях”.
Падчас пералёту ды і ў самім Рыа алімпійцаў просяць піць дробнымі глыткамі негазіраваную ваду “камфортнай тэмпературы”.
Спарстменаў просяць не пакідаць свае бутэлькі з вадой без нагляду. І ўвогуле рэкамендуюць толькі бутыляваную ваду.
“Нават падчас чысткі зубоў! З асцярожнасцю прымайце душ. Нягледзячы на тое, што басейн месціцца прама ля нашага корпусу ў алімпійскай вёсцы, просьба не карыстацца ім да стартаў”.
Спартсменаў просяць нічога не есці на дварэ, не ласавацца ніякімі дэсертамі, часта карыстацца санітарнымі гелямі.
Карыстацца грамадскім транспартам не рэкамендуюць увогуле. Што тычыцца таксовак, то варта сядаць у машыны з лічыльнікамі.
“Таксама даволі бяспечна карыстацца міжнароднымі сервісамі, напрыклад, UBER”, — напісана ў “Рэкамендацыях”.
Здымаць грошы ў бразільскіх банкаматах — латарэя. Можа, пранясе, можа, усе фінансы скрадуць кардэры. Таму алімпійцам рэкамендуюць захоўваць на картках суму, “страта якой не будзе катастрафічнай”.
“Заўжды, нават у самых надзейных з выгляду месцах, пры зняцці грошай з банкамата пры наборы ПІН-коду адной рукой прыкрывайце клавішы, якія вы націскаеце. Гэта трэба абавязкова рабіць — не толькі для таго, каб не пабачылі людзі, што стаяць побач, але, самае галоўнае, каб не пабачыла мініяцюрная камера, якую могуць усталяваць зламыснікі”, — папярэджваюць беларускіх спартсменаў.
Яшчэ адна небяспека — акіян. Не варта купацца п’янымі і спаборнічаць у стылі “хто далей праплыве”. Рэкамендуецца купанне “на глыбіні не вышэй за пояс чалавека”.
“У плане бяспекі ніхто ў Рыа ні ад чаго не застрахаваны. Ішла рэпетыцыя адкрыцця, і там абрабавалі чалавека. Але спартсмены будуць знаходзіцца ў зоне, якая ахоўваецца. Туды камар не праляціць. Проста не трэба вылазіць за межы гэтай зоны”, — простымі словамі раіць дырэктар РЦАП па лёгкай атлетыцы Васіль Іванюк.
Камароў варта баяцца яшчэ больш за крымінальнікаў. Мясцовыя насякомыя распаўсюджваюць вірусы, у тым ліку Зіка.
“Там цяпер зіма. І актыўнасць насякомых меншая. А лета пачынаецца ў верасні-кастрычніку”, — супакойвае Васіль Іванюк.
Да таго ж бразільскія ўлады прымаюць дадатковыя меры. Аднак алімпійская вёска месціцца на асушаным балоце, таму рызыка “атакі” насякомых застаецца высокай. Пра гэта наўпрост сказана ў “Рэкамендацыях”.
Таксама асаблівая ўвага надаецца вірусу Зіка.
“Жанчынам, якія плануюць стварыць сям’ю, варта пазбягаць зачацця цягам 4 тыдняў пасля прыезду з Бразіліі”.
Цягам месяца па вяртанні з Бразіліі ў Беларусь нельга здаваць донарскую кроў.
Складальнікі “Рэкамендацыяў” са спасылкай на Сусветную арганізацыю аховы здароўя нагадваюць, што падчас сэксуальных кантактаў трэба карыстацца прэзерватывамі. Не можаш — адмаўляйся ад інтымнай блізкасці падчас знаходжання ў Рыа і цягам 4 тыдняў па вяртанні.
Алімпійскія гульні-2016 пройдуць з 5 па 21 жніўня. Беларусь прадставяць 123 спартсмены.