22 лютага кіраўнік дзяржавы правёў нараду, на якой жорстка крытыкаваў урад за сітуацыю з тарыфамі на ЖКГ і праезд. Калі павысім кошты, то пакрыўдзім людзей, плюнем ім у душу, сказаў Аляксандр Лукашэнка. Ён нават прапанаваў публічна надзець кайданкі "дзясятку-другому чалавек", якія не выканалі яго загад у справе тарыфаў.
У той час, калі Лукашэнка гаварыў пра тарыфы на праезд, ён неасцярожна падняў аркуш са сваімі запісамі і яны часткова трапілі на відэа БЕЛТА. Першым звярнуў увагу на гэта эканаміст Сяргей Чалы. Ён расшыфраваў некаторыя словы: "Павышэн[не] акцызаў на аўтамаб[ільнае] пал[іва] 50%", "акцызы тытунь", "тарыфы... трэба правесці рэвізію...".