У Міністэрстве адукацыі заявілі, што "прыстроілі" ўсіх студэнтаў закрытых сёлета ВНУ. А такіх у 2024 годзе было два: Універсітэт права і сацыяльна-інфармацыйных тэхналогій (БІП) і Інстытут прадпрымальніцкай дзейнасці (ІПД).
Фармальна рашэнні аб закрыцці гэтых навучальных устаноў прынялі заснавальнікі. Аднак ад экспертаў у галіне адукацыі не схавалася кампанія барацьбы з прыватнымі ўніверсітэтамі, школамі і нават дзіцячымі садкамі, якую ўлады Беларусі разгарнулі пасля падзеяў 2020 года.
З 1 верасня колькасць ВНУ ў Беларусі скарацілася з 49 да 47. "Усе студэнты, якія навучаліся ў гэтых [закрытых. — Еўрарадыё] універсітэтах, пераведзеныя ў іншыя ВНУ. На вуліцы ніхто не застаўся", — каментуе Начальнік галоўнага ўпраўлення прафесійнай адукацыі Мінадукацыі Беларусі Сяргей Пішчоў.
Ён дадаў, што студэнтам прапанавалі варыянты пераводу цэлымі групамі. Таксама маладыя людзі пераводзіліся ў індывідуальным парадку.
Выкладчыкі закрытых ВНУ таксама не застануцца без працы. Праўда, не ўсё.
— З іншых устаноў адукацыі ўжо прыходзілі запыты на выкладчыкаў. Таму тыя з іх, хто патрэбны нашым універсітэтам, застануцца працаваць, — рэзюмаваў Пішчоў.