Міністэрства замежных спраў адказала на петыцыю, у якой грамадзяне Беларусі патрабавалі забараніць уезд кітайцам у сувязі з каранавіруснай інфекцыяй.
Петыцыя з'явілася на сайце Petitions.by на пачатку лютага. За тры дні пад ёй набралі 698 подпісаў.
У сваім адказе на петыцыю начальнік Галоўнага консульскага ўпраўлення МЗС Аляксандр Хайноўскі паведаміў, што такія рашэнні прымаюцца на падставе аналізу, праведзенага Міністэрствам аховы здароўя.
А ў Мінздароўя, па яго словах, паведамілі наступнае:
Сусветная арганізацыя аховы здароўя (СААЗ) не рэкамэндуе на цяперашні час уводзіць абмежаванні на паездкі і гандаль з Кітаем ды іншымі краінамі, дзе зарэгістраваныя выпадкі захворвання на каранавірус. На распаўсюд хваробы такія забароны не ўплываюць, а толькі перасоўваюць у часе пік інфікавання. У Кітаі і так уведзеныя абмежавальныя захады, спыненыя авіязносіны.
У Нацыянальным аэрапорце Мінск праводзяць двайны кантроль людзей, якія прыбываюць з Кітаю — з выкарыстаннем цеплавізараў і лабараторных абследаванняў, а пасля прылёту праводзяць 14-дзённае медыцынскае назіранне.
Кітайскіх работнікаў перавозяць і размяшчаюць пры мінімальным кантакце з навакольнымі. Для іх таксама арганізаванае назіраннелекараў. Кітайскіх студэнтаў, якія вярнуліся з зімовых вакацыяў, часова размясцілі ў аздараўленчых комплексах.
"Спыненне авіязносінаў з КНР у цяперашні час падаецца немэтазгодным па шэрагу падставаў", — канстатуе чыноўнік.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.