За акцыю "Ланцуг памяці", якая прайшла каля КДБ 29 кастрычніка, Мікалая Статкевіча асудзілі на пяць сутак арышту. Сам палітык у каментары Радыё "Свабода" паведаміў, што прысуд яму вынеслі за пост у Фэйсбуку, дзе ён заклікаў людзей прыйсці на гэтую акцыю.
Пакуль што Статкевіч на волі.
Копію судовага рашэння апазіцыянер атрымаў 22 лістапада па пошце. Калі адбыўся суд, ён не ведае. Разам з тым, Статкевіча аштрафавалі за ўдзел у дзвюх вулічных акцыях — агулам на 2000 рублёў. Па яго словах, у дакуменце не ўдакладняецца, за якія менавіта акцыі яго аштрафавалі.
Палітык дадаў, што падобныя лісты пра штрафы прыйшлі яго паплечнікам і жонцы Марыне Адамовіч, якія бралі ўдзел у вулічных акцыях.
Як распавядала Еўрарадыё, акцыя "Ланцуг памяці" каля будынку КДБ адбылася ўвечары 29 кастрычніка. Гэтая акцыя прысвячалася 81-й гадавіне так званай "чорнай ночы", калі былі расстраляныя больш за 100 прадстаўнікоў беларускай інтэлігенцыі: літаратары, навукоўцы, дзяржаўныя дзеячы. Удзельнікі "Ланцуга памяці" трымалі ў руках партрэты растраляных і свечкі.