Магілёўскі актывіст Аляксандр Хамратаў папрасіў міліцыю пачаць адміністрацыйную справу на дэпутата Палаты прадстаўнікоў Ігара Марзалюка, піша праваабарончы сайт mspring.online.
Нагодай стала адкрыццё парэнчаў на спуску ў парку ў раёне вуліцы 30 гадоў Перамогі. Яно адбылося на пачатку траўня.
Хамратаў звярнуў увагу, што падчас мерапрыемства адсутнічалі супрацоўнікі міліцыі, хуткай дапамогі і МНС. Актывіст падкрэслівае: "Згодна з законам "Аб масавых мерапрыемствах", усе гэтыя службы павінны былі там прысутнічаць — гэта абавязковая ўмова". Ён папрасіў міліцыю правесці праверку ў дачыненні да Ігара Марзалюка і пачаць адміністрацыйную справу за парушэнне заканадаўства аб масавых мерапрыемствах.
Участковы інспектар Арцём Чыж адказаў Хамратаву, што апытаў Марзалюка. Дэпутат заявіў, што парэнчы былі пастаўленыя па просьбе мясцовых жыхароў. А ўрачыстае адкрыццё канструкцыі, якое паказвалі нават па тэлевізіі, ён назваў "сустрэчай з выбаршчыкамі".
Ленінскі РАУС Магілёва адмовіўся пачынаць працэс на Марзалюка — за адсутнасцю складу правапарушэння.
Аднак Хамратаў лічыць адказ міліцыянтаў фармальным, бо ў ім няма канкрэтных фармулёвак і адсылак да старонак закона. "Масавыя мерапрыемствы не адмяняюцца як такія, калі ты дэпутат. Я буду абскарджваць пастанову міліцыі ў судзе за неабгрунтаванасць", — заяўляе актывіст.