“Магу ўзяць за 150 еўра”. Колькі каштуе паехаць спадарожнікам з Мінска ў Вільню

Праз скарачэнне колькасці аўтобусных рэйсаў у Літву беларусы вымушаныя пераплочваць, каб дабрацца з Вільні ў Мінск і наадварот.

Купіць білеты на аўтобус у абодва бакі стала значна складаней: напрыклад, да канца жніўня ўсё распрададзена. Але застаецца варыянт — ехаць са спадарожнікамі. Праўда, цяпер гэта каштуе нямала грошай.

“Хто займаецца перавозкамі — там увогуле цэны шалёныя”

Цяпер у памежных чатах асаблівая актыўнасць: беларусы кінуліся шукаць сабе папутку ў Літву. У параўнанні з тым, што было месяц таму, такіх запытаў стала ў разы больш: у адным з чатаў кожную гадзіну з'яўляецца некалькі дзясяткаў паведамленняў з пытаннямі, з кім можна перасекчы мяжу.

Журналіст Еўрарадыё пад выглядам звычайнага пасажыра запытаўся пра кошт паездкі. Адказ — 50 еўра (больш за 150 беларускіх рублёў).

 — А можаце падказаць, колькі ў сярэднім за гэта просяць? Каб арыентавацца.
— Усе па-рознаму, глядзячы ў каго якое аўто.
— Ну, у сярэднім, ад 50 еўра?
— Так.

Кацярына, якая шукала, каго можна падвезці з Вільні ў Мінск, таксама распавяла, што возьме чалавека за 50 еўра.

А яшчэ адзін кіроўца, Дзмітрый, кажа, што бярэ столькі ж, колькі каштуе білет на аўтобус (ад 239 да 322 рублёў).

Ігар таксама бярэ з чалавека па 50 еўра, але на бліжэйшую паездку ў яго ўжо ўся машына занята.

— Усе па-рознаму, думаю, што да Мінска менш за 50 не будзе, калі хтосьці едзе проста так, а калі гэта тыя, хто займаецца перавозкамі — там увогуле цэны шалёныя. Найлепшы варыянт — даехаць да мяжы і ўжо ля мяжы падсесці да кагосьці.

Проста на мяжы падсесці значна танней: Аляксандр, у якога 6 месцаў да Мінска, стаіць зараз у чарзе і бярэ за гэта 20 еўра.

Яшчэ адзін кіроўца, Ігар, рэгулярна возіць спадарожнікаў з Мінска ў сталіцу Літвы. У яго цэны вышэйшыя.

 — 70 еўра, але не зразумела, ці будзе вольнае месца на вашу дату.

Такі ж кошт і ў Крысціны — 20 жніўня яна едзе з Вільні ў Мінск.

А самым дарагім аказваецца Рымантас.

 — Магу ўзяць вас за 150 еўра — вы будзеце адзін. Калі хочаце, можаце знайсці яшчэ аднаго чалавека, тады з кожнага будзе па 100 еўра. То бок вам трэба будзе заплаціць на 50 менш.

Прапановы ўзяць папутчыка за кошт бензіну, якія раней сустракаліся, цяпер амаль зніклі.

Што адбываецца на беларуска-літоўскай мяжы?

Аўтобусныя перавозчыкі пачалі адмяняць рэйсы ў Вільню і Каўнас з 11 жніўня. Спачатку гучала версія, што гэта адбылося з-за вайсковых вучэнняў, аднак прычына аказалася іншай.

У Літоўскай адміністрацыі транспартнай бяспекі тлумачылі Еўрарадыё, што адмена рэйсаў звязаная з увядзеннем надзвычайнага становішча на літоўска-беларускай мяжы. Праз гэта Літве давялося выдзеліць больш сродкаў і спецыялістаў для аховы мяжы, і прапускная здольнасць пунктаў пропуску зменшылася. Цяпер праз беларуска-літоўскую мяжу могуць праязджаць не больш за 29 аўтобусаў у дзень.