Беларускім санаторыям за мяжой цяпер будзе прасцей працаваць
Чыноўнікі вынеслі на грамадскае абмеркаванне праект указа, які ўносіць змены ў парадак правядзення дзяржаўных закупак. Адно з прапанаваных новаўвядзенняў датычыцца Кіраўніцтва справамі прэзідэнта (КСП).
Так, з-пад дзеяння заканадаўства аб закупках могуць вывесці замежныя ўстановы, якія належаць КСП. Аргументацыя такая: КСП валодае пяццю санаторыямі ў Сочы, Туапсэ, Крыме, Друскінінкаі і Юрмале. Яны адначасова вымушаныя падпарадкоўвацца заканадаўству краін, у якіх размешчаныя.
Фактычна гэтыя санаторыі змогуць закупляць тавары і паслугі ў рэзідэнтаў краін знаходжання толькі з абмежаваннямі мясцовага заканадаўства. У тэорыі гэта зробіць працэс закупак і менш празрыстым: як мы даведаемся, якія закупкі будуць праходзіць праз санаторый у Крыме?
Акрамя таго, дзеянне заканадаўства не будзе распаўсюджвацца на закупкі для забеспячэння дзейнасці "афіцыйных прадстаўнікоў рэспубліканскіх органаў дзяржаўнага кіравання ў замежных установах", гэта значыць для накіраваных на працу ў амбасадах чыноўнікаў.
Зрэшты, гаворка сапраўды можа ісці пра большую выгоднасць і прастату правядзення закупак. Пры гэтым іх празрыстасць аб'ектыўна можа пацярпець.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.