Паліцыя, ілюстрацыйнае фота / pexels.com
На беларусаў, якія жывуць у ЗША, ціснуць супрацоўнікі беларускіх спецслужбаў. Пра гэта паведамляе юрыдычны дэпартамент Офіса Святланы Ціханоўскай.
З беларусамі ў Штатах праз мэсэнджары звязваюцца людзі, якія называюць сябе супрацоўнікамі беларускіх праваахоўных органаў. Яны распытваюць пра ўдзел у пратэстах, палітычныя погляды і дзейнасць за мяжой. Акрамя таго, яны запалохваюць эмігрантаў і пагражаюць перадаць інфармацыю пра іх у амерыканскую іміграцыйную службу ICE.
Кіраўнік юрыдычнага дэпартамента Леанід Марозаў кажа, што гэтыя дзеянні незаконныя і маюць прыкметы транснацыянальных рэпрэсій. Пагрозы выкарыстоўваць ICE, на яго думку, хутчэй за ўсё з'яўляюцца толькі спробай запалохаць.
Тым, да каго звярнуліся беларускія сілавікі, рэкамендуюць не ўступаць у дыскусіі, захаваць доказы (перапіскі, нумары тэлефонаў, нікнэйм, спасылкі на профілі ў Тэлеграме, Фэйсбуку ды іншых сацсетках), звярнуцца ў ФБР і папярэдзіць сваякоў у Беларусі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут