Леанід Судаленка
Камітэт ААН па правах чалавека прызнаў, што беларускія ўлады парушалі недатыкальнасць прыватнага жыцця праваабаронцы Леаніда Судаленкі, піша праваабарончы цэнтр "Вясна".
Судаленка звяртаўся туды яшчэ ў 2015 годзе і скардзіўся наконт паглыбленых даглядаў на мяжы і існавання "палітычнага спісу" ў памежнікаў.
Камітэт ААН прыйшоў да высновы, што кожны чалавек мае права ведаць, якія персанальныя даныя і для якіх мэтаў захоўваюцца ў аўтаматычных базах даных дзяржаўных органаў. Таксама кожны павінен мець магчымасць высветліць, якія дзяржорганы кантралююць ці могуць кантраляваць персанальныя даныя і іх адпаведнасць рэчаіснасці.
Каментуючы рашэнне, Судаленка адзначыў, што гэта адно з першых рашэнняў Камітэта ААН па правах чалавека наконт недатыкальнасці прыватнага жыцця беларусаў: "Я б назваў прынятае рашэнне прэцэдентным, бо яно тычыцца таемнай мадыфікацыі асабістых даных грамадзян у камп'ютарных сістэмах дзяржаўных органаў".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут