Сталі вядомыя падрабязнасці інцыдэнта ў Гродне, дзе мужчына падпаліў дзверы пункту аховы правапарадку. Палітычнага падтэксту ў справе няма.
Як распавядала Еўрарадыё, здарэнне адбылося ўдзень 3 лістапада. Мужчына ў балаклаве падышоў да дзвярэй "апоркі", абліў іх гаручай вадкасцю і падпаліў. Неўзабаве яго затрымалі.
Як паведамляе тэлеканал СТБ, 41-гадовы падазраваны купіў літр бензіну ў кіроўцы і пераліў яго ў пластыкавую бутэльку. Гэта зафіксавалі камеры відэаназірання. Потым ён пайшоў да "апоркі", абліў дзверы бензінам і падпаліў іх.
Полымя пашкодзіла толькі пластыкавыя дзверы, у памяшканне агонь не трапіў. Дарэчы, падчас падпалу міліцыянтаў у "апорцы" не было.
Калі гродзенца затрымалі, ён быў нецвярозы. Свае дзеянні ён патлумачыў крыўдай за несправядлівы, на яго думку, прысуд: "Мною рухала несправядлівасць. Мяне асудзілі па 364-м артыкуле з-за гэтага патрона". (Артыкул 364 Крымінальнага кодэксу — гвалт або пагроза гвалту ў дачыненні да супрацоўніка міліцыі. — Еўрарадыё.)
Міліцыянты пацікавіліся, ці меў гэты падпал палітычныя матывы.
"Не, я да гэтага дачынення не маю. Я сам супраць Ціханоўскай і супраць амерыканцаў. Дзе амерыканцы, там разруха і смерць", — адказаў падазраваны.
На мужчыну пачал крымінальную справу за хуліганства.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
To see this content visit the full version of this page.