Салі Дэвіс, адна з чатырох галоўных лекараў Вялікабрытаніі, разаслала цыркуляр участковым дактарам. Яна папярэджвае іх пра неабходнасць прапісваць належны курс лячэння ад ганарэі.
Прычынай стала ўспышка так званай суперганарэі ў горадзе Лідсе, размешчаным на поўначы Англіі, інфармуе BBC. Медыкі мяркуюць, што некаторым пацыентам не быў прапісаны належны курс з двух антыбіётыкаў.
У сакавіку на поўначы Англіі быў выяўлены рэзістэнтны штам ганарэі. Ён не паддаецца лячэнню антыбіётыкам азітраміцынам, які звычайна прапісваюць разам з іншым прэпаратам — цэфтрыяксонам.
Ганарэя распаўсюджваецца шляхам вагінальнага, аральнага або анальнага палавога кантакту. Інфекцыя суправаджаецца гнойнымі выдзяленнямі з палавых органаў зялёнага або жоўтага колеру, болем пры мачавыпусканні, крывацёкамі ў жанчын у перыяд паміж менструацыямі ды іншымі сімптомамі.
Нявылечаная ганарэя вядзе, у прыватнасці, да бясплоддзя, запаленчых захворванняў тазавых органаў і можа перадавацца дзіцяці падчас цяжарнасці.
Фота: BBC