Мікалай Баскоў падчас прауладнага мітынгу ў 2020 годзе / LookByMedia
Федэрацыя хакея Беларусі (ФХБ) выступіла ў падтрымку рашэння Спартыўнага арбітражнага суда (CAS), які абавязаў Міжнародную федэрацыю хакея (ІІХФ) дапусціць зборныя Расіі да міжнародных спаборніцтваў. Пра гэта гаворыцца ў заяве ФХБ.
Паводле рашэння CAS, ІІХФ павінна дапусціць усе расійскія зборныя да сістэмы чэмпіянатаў свету пачынаючы з сезона 2026/2027. У федэрацыі заявілі, што "цалкам падтрымліваюць" гэтае рашэнне.
У ФХБ таксама паведамілі, што ў бліжэйшы час чакаецца рашэнне Дысцыплінарнай калегіі ІІХФ аб аднаўленні ў правах нацыянальнай і маладзёжнай зборных Беларусі.
Нагадаем, што Міжнародная федэрацыя хакея была расчараваная такім рашэннем CAS і не згодная з ім. Тым не менш федэрацыя будзе выконваць рашэнне суда.
У ІІХФ адзначаюць, што некаторыя турніры знаходзяцца на высокай ступені падрыхтоўкі. Для выканання рашэння Арбітражнага суда спатрэбіцца перагледзець фармат спаборніцтваў, расклады, арганізацыю паездак і пражывання, а таксама меры бяспекі. Зрабіць гэта неадкладна немагчыма.
Расійскія спартсмены патрапілі пад міжнародныя санкцыі пасля шырокамаштабнага расійскага ўварвання ва Украіну ў 2022 годзе. Разам з імі ў міжнародны "бан" патрапілі і беларусы.
Нядаўна Міжнародны алімпійскі камітэт рэкамендаваў спартыўным федэрацыям зняць абмежаванні з беларускіх і расійскіх спартсменаў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут