Днямі закончыўся суд над былым супрацоўнікам Міністэрства замежных спраў Аляксандрам Сакалоўскім. Яго вінавацілі ў здрадзе дзяржаве, таму суд над ім быў закрытым. Паводле інфармацыі "Нашай Нівы", мужчыну асудзілі на 10 гадоў зняволення.
Адзін з сяброў дыпламата расказаў журналістам, што затрымалі Сакалоўскага яшчэ ў 2019 годзе. З таго часу ён сядзеў у СІЗА КДБ.
"Ён ведаў, што яго затрымаюць, але пра дэталі справы не распаўсюджваўся. Вядома толькі, што гэта звязана з нейкім яго ўчынкам ці то 10-гадовай, ці то 12-гадовай даўніны, які ён здзейсніў калі працаваў консулам у Літве", — паведаміў мужчына.
Былыя калегі Сакалоўскага кажуць, што ён працаваў на розных пасадах у МЗС, за мяжой і ў самім міністэрстве, але нічым асаблівым не вылучаўся. Дыпламаты падазраюць, што Сакалоўскі мог супрацоўнічаць са спецслужбамі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут