Джокер / IMDb
Готэм-сіці. Вуліцы — працяг сцёкавых канаў, а канавы запоўненыя крывёй і смеццем. Вось-вось сцёкі будуць канчаткова забітыя і ўся гарадская поскудзь пачне тануць. Смецяры страйкуюць, і ўжо няма каму прыбраць за людзьмі. Назапашаны бруд пажаднасці, забойстваў і прагнасці хутка ўспеніцца да пояса. Тоўстыя нахабныя пацукі шныраць па падваротнях, адчуваючы сябе каралямі вуліц.
Артур Флэк пакрывае твар акцёрскім грымам. Ён дзіўны белы мужчына сярэдняга веку, які жыве са сваёй маці. Атрымлівае мінімальны заробак, працуючы клоўнам па найме. І марыць стаць стендап-комікам. Яго зневажаюць на кожным кроку. Яго пастаянна абражаюць і збіваюць. Флэк няўдалы, адчужаны, пакрыўджаны і, што найбольш важна, глыбока занепакоены. Ён напружаны, нервуецца і не можа расслабіцца.
Згорблены і знясілены, ён смяецца, смяецца і смяецца. Але не ад радасці. У Артура псіхічнае захворванне: калі вельмі моцна хвалюецца, ён не можа кантраляваць свой вар'яцкі смех. Гэта знакаміты вар'яцкі "смех Джокера". Яго падаюць як нейкую турэтычную рэакцыю на стрэс, якую ён не можа кантраляваць.
З-за скарачэння гарадскога бюджэту сацыяльныя службы больш не могуць забяспечваць яго лекамі, якія хоць неяк дапамагалі яму спакойна жыць. У кароткай сцэне са сваім псіхатэрапеўтам Флэк хвалюецца з-за руціннага характару пытанняў, якія яна задае: "Вы проста задаяце адны і тыя ж пытанні кожны тыдзень: "Як ваша праца? У цябе ёсць нейкія негатыўныя думкі? "Усё, што ў мяне ёсць, — гэта негатыўныя думкі". Ён глядзіць на тэрапеўта, які кажа яму, што яны больш не сустрэнуцца ў будучыні. Яна бачыць у ім нешта, што не можа выправіць, і яны абодва гэта ведаюць.
Калі ў коміксе для стварэння Джокера стваральнікі апусцілі Артура Флэка ў чан з атрутнымі хімікатамі, то рэжысёр Тод Філіпс апусціў зародак Джокера ў таксічнае і жорсткае грамадства Готэм-сіці, які загнівае.
Горад, які памірае ад шаленства, беднасці і абыякавасці. Людзі-прусакі, што бегаюць па вуліцы і шукаюць гераін, дзіцячую парнаграфію ці каго б пабіць і згвалтаваць. Голыя жанчыны на афішах і вітрынах. Кідкіх расфарбовак надпісы прапануюць самае рознае каханне, але не амерыканскае.
Па меры таго як Артур усё глыбей і глыбей апускаецца ў лютасць і адчай, забойства становіцца яго адзіным выйсцем, разрадкай, а зброя — яго адзіным сябрам. Забойства падымаюць на сцягі супраціву і барацьбы за годнасць. Клоўн становіцца сімвалам пратэсту.
За межамі заблытанага ўнутранага свету Артура горад бурыцца, сацыяльная і фінансавая няроўнасць бударажыць пакрыўджаных людзей. Яны адчайна спрабуюць вярнуць сабе гонар і годнасць.
Фільм уяўляе сабой трывожнае і захапляльнае даследаванне характару будучага галоўнага злачынца DC. Пры гэтым рэжысёр практычна цалкам адмаўляецца ад коміксавых атрыбутаў. Гэта псіхалагічная драма пра трансфармацыю стомленага, няшчаснага, траўмаванага і самотнага чалавека ў жорсткага маніякальнага забойцу.
Ён бязлітасна распраўляецца з маці, з прыяцелем, з нахабнымі брокерамі з Уол-стрыт. Першае забойства яго бянтэжыць і шакуе, ён чакае, што будзе вінаваціць сябе, але ў выніку прызнаецца, што яму спадабалася. І пасля гэтага ў забойствах ён спакойны, крывавы і бязлітасны.
Артур спускаецца па лесвіцы, нібы герой рок-н-рола. Па той самай лесвіцы, па якой ён кожны дзень панура спускаўся і ўздымаўся. Але цяпер ён іншы. Гэта самы энергічны момант у фільме. Да чаго ён прыводзіць? Артур натхняе хаос і анархію, горад паглыбляецца ў вар'яцтва і масавыя беспарадкі.
"Джокер" чэрпае натхненне ў фільмах Марціна Скарсэзэ і неануары, дзе часта фігуруюць сумнеўныя героі, якія здзяйсняюць злачынствы і ліхадзействы. Вы можаце любіць галоўных герояў у "Слаўных хлопцах", "Казіно", "Каралю камедыі" ці "Кіроўцу", але ўсе яны не вельмі добрыя людзі.
Рэжысёру Тоду Філіпсу ўсё ж даводзіцца рабіць адсылкі і ўпісваць фільм у міфалогію Готэма. Адна сцэна для фанатаў, з адсылачкай да гісторыі Бэтмена. Але калі прыбраць яе, то фільм зусім нічога не губляе.
З ненармальнай цікаўнасцю ты назіраеш за тым, як ён падымаецца да становішча легендарнага злачынцы Готэма. Кульмінацыяй гісторыі Артура ёсць жудасны трыумф чалавека, які цяпер ператварыўся ў Джокера.
Ён — квінтэсэнцыя хаосу, вар'яцтва і анархізму. Джокер у фільме не верыць у палітыку, не верыць у пратэсты. Ён сцвярджае, што ў яго няма палітычных поглядаў. Але ён, безумоўна, сам па сабе частка палітыкі, кроў ад крыві, плоць ад плоці тых палітычны рашэнняў, што былі здзейснены. І народжаны дзякуючы гэтым рашэнням, першае, што новаспечаных антыгерой Готэма робіць, — здзяйсняе "забойства бацькi" і знішчае старыя ідалы.
Яшчэ да выхаду ў пракат фільм апынуўся ў цэнтры чарговага скандалу, звязанага з масавымі забойствамі ў ЗША. Частка амерыканскай грамадскасці была занепакоеная, ці не справакуе гэты фільм чарговыя масавыя забойствы. У прыклад ставілі інцыдэнт 2012 года ў амерыканскім горадзе Арора, дзе на прэм'еры заключнага трэцяга фільма "Цёмны рыцар: Адраджэнне легенды" стралок уварваўся ў кіназалу і забіў 13 чалавек.
Акцёр, які сыграў галоўную ролю ў фільме, Хаакін Фенікс, адказваючы на пытанне, ці не баяцца стваральнікі фільма, што людзі будуць выкарыстоўваць персанажа ў якасці натхнення або апраўдання для сваіх дзеянняў, заявіў, што ўся адказнасць ляжыць на самім чалавеку, а зусім не на фільме:
"Я сапраўды лічу, што аўдыторыя павінна быць у стане зразумець розніцу паміж правільным і няправільным. Я не думаю, што рэжысёр абавязаны вучыць маралі. Калі людзі не ведаюць розніцу паміж правільным і няправільным, то ёсць мноства рэчаў, якія вы будзеце інтэрпрэтаваць так, як вам захочацца".
Армія ЗША разаслала сваім супрацоўнікам папярэджанне аб магчымым гвалце ў кінатэатрах, дзе будуць паказваць фільм. Адзначаючы папулярнасць персанажа Джокера сярод маргінальных супольнасцяў. У асобным мемарандуме гаварылася, што войска атрымала "верагодную" інфармацыю ад праваахоўных органаў Тэхаса, якая датычыцца нападу на невядомы кінатэатр. Аднак неўзабаве ФБР і Служба нацыянальнай бяспекі не выявілі ніякіх дакладных пагроз, звязаных з выхадам фільма.
Фільм "Джокер" дае свайму галоўнаму герою да страшнага праўдападобную гісторыю паходжання. Гэта новы віток, пасля трылогіі Нолана пра Бэтмена, цёмнай эвалюцыі кіно, натхнёнага коміксамі. Хаакін Фенікс дзівосны ў ролі псіхічна хворага чалавека, які па выніку становіцца легендарным клоўнам-забойцам — Джокерам.
У "Джокера" ёсць бясспрэчны стыль і магутная гісторыя, якая па ходзе апавядання вымалёўваецца і глядзіць на нас з гідкай няўмольнасцю. Гэта цудоўны фільм, прысвечаны смерці парадку і гніенню кіруючага класа. "Джокер" — разумны, стыльны і трывожны фільм: ён адлюстроўвае чалавека, які ёсць прадуктам нашай эпохі.
Новага "Джокера" можна паглядзець у Falcon Club Буцік кіно. Дзякуй ім за магчымасць ацаніць фільм да прэм'еры.