Чыноўнікі прыдумалі, і як зэканоміць, і як падтрымаць БРСМ фінансава / фота Улада Рубанава, Еўрарадыё
Чыноўнікі вырашылі пабудаваць патрыятычны лагер для дзяцей у Брэсцкай крэпасці. А заадно прафінансаваць БРСМ за кошт падатковых ільгот і недарагой, а мо і зусім бясплатнай рабочай сілы. План добры для ўсіх, акрамя студэнтаў, якім некалькі гадоў давядзецца за капейкі ўлягаць у працу на "ўсебеларускай моладзевай будоўлі".
Еўрарадыё з дапамогай аб'яднання беларускіх сілавікоў BELPOL расказвае, як нават пры нястачы грошай у Беларусі штампуюцца месцы для ідэалагічнай апрацоўкі, а БРСМ атрымлівае ад гэтага свой працэнт (але ўжо грашыма).
Мегабудоўлю задумалі ў Брэсцкай крэпасці. Там, у пабудаваным у 1933-1935 гадах будынку былога штаба артылерыйскага палка, ужо працуе абласны моладзевы патрыятычны цэнтр, які па ініцыятыве Мінабароны плануюць павялічыць да Рэспубліканскага цэнтра патрыятычнага выхавання моладзі ў Брэсцкай крэпасці.
Для гэтага казармы плошчай у 2 тысячы квадратных метраў трэба рэканструяваць у два інтэрнаты. Адзін, на 38 месцаў — для дзяўчынак, і другі, на 196 месцаў — для хлопчыкаў. А летам тут будзе размяшчацца яшчэ і намётавы гарадок на 200 чалавек.
З бюджэту ж на "патрыятычны цэнтр" выдзелены сціплы 1 млн рублёў у 2023 годзе, яшчэ 16 млн — у 2024 годзе і 24,5 млн — у 2025 годзе.
Каб зэканоміць, ідэолагі і чыноўнікі знайшлі элегантны выхад.
— У чэрвені 2023 года да лукашыстаў прыходзіць "геніяльная думка" — надаць [будаванню цэнтра] статус Усебеларускай моладзевай будоўлі. Афіцыйным прыкрыццём з'яўляецца "павышэнне сацыяльнай актыўнасці моладзі, садзейнічанне працоўнаму выхаванню маладых грамадзян, фармаванне ў іх пачуцця дачынення да гісторыі краіны, яе гісторыка-культурнай і духоўнай спадчыны". Але належыць чытаць — дармовая рабочая сіла, — адзначае BELPOL.
У брэсцкім аддзеле БРСМ нам расказваюць, што работы на аб'екце пачнуцца толькі ў наступным годзе. Таму там не могуць адпавесці, колькі будуць плаціць патрыятычным студэнтам, і ці будуць нешта плаціць наогул.
Вось, да прыкладу, да будоўлі на тэрыторыі мемарыяльнага комплексу "Хатынь" прыцягваліся валанцёры. Звычайна — настаўнікі ці студэнты, якіх адпраўляюць працаваць хочаш не хочаш. Тады гаворкі пра грошы не было.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут