Беларусь чакае да канца лета 700 мільёнаў долараў расійскага крэдыту. Пра гэта паведаміў намеснік міністра фінансаў Максім Ермаловіч. Паводле яго слоў, у перамовах з Расійскай Федэрацыяй па атрыманні крэдыту ніякіх праблем не ўзнікае.
“Ідзе звычайны, стандартны працэс перамоў, чакаем рашэння расійскага боку, — цытуе словы Ермаловіча БЕЛТА. — Узгадняем умовы і параметры крэдыту. Гэта нармальны працэс”. Намеснік міністра фінансаў падкрэслівае, што “фактычнае атрыманне сродкаў” у Мінску чакаюць у ліпені-жніўні.
Як паведамляла Еўрарадыё, 29 чэрвеня стала вядома, што наша краіна атрымала чацвёрты транш фінансавага крэдыту Еўразійскага фонду стабілізацыі і развіцця — 300 мільёнаў долараў.