У Беларусі не адменяць ніводнае масавае мерапрыемства, прымеркаванае да Дня Перамогі. Пра гэта Аляксандр Лукашэнка заявіў у гутарцы з прэзідэнтам Малдовы Ігарам Дадонам. Перамовы ў фармаце відэканферэнцыі прайшлі 4 траўня.
Беларускі кіраўнік паведаміў, што масавыя мерапрыемствы да Дня Перамогі рыхтаваліся яшчэ з канца мінулага года. Самае важнае сярод іх — парад Перамогі. Таксама на 8 траўня запланавана мерапрыемства ў крыпце храма-помніка ў гонар Усіх Святых у Мінску. Там закладуць капсулы з зямлёй, прывезенай з розных дзяржаў, гарадоў-герояў.
"Мы вывучалі шмат варыянтаў. Але я прыйшоў пасля вывучэння ўсёй інфармацыі да такой высновы, што мы не можам адмяніць ні адно з гэтых мерапрыемстваў. Мы ніводнага мерапрыемства не адмяняем", — перадае БЕЛТА словы Лукашэнкі.
Кіраўнік Беларусі заявіў, што нікога на масавыя мерапрыемствы не будуць цягнуць і заганяць. Па яго словах, там і так будзе дастаткова шмат людзей.
Раней Лукашэнка тлумачыў, што ўлады не могуць адмяніць парад, бо гэта можа быць успрынята як боязь каранавіруса.
Як распавядала Еўрарадыё, 9 траўня ў цэнтры Мінска на плошчы Перамогі таксама адбудзецца святочны канцэрт.
На сёння ад каранавіруса ў Беларусі памерлі 103 чалавекі, агульная колькасць хворых перавысіла 17 тысяч пацыентаў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.