Амаль 25 тысяч чалавек зарэгістраваліся на ЦТ па фізіцы, якое пройдзе 25 чэрвеня. Такую лічбу агенцтву БЕЛТА назваў дырэктар Рэспубліканскага інстытута кантролю ведаў Юрый Міксюк.
Іспыт пачнецца ў 11:00. Прыйсці на яго раяць прыкладна за паўгадзіны, каб паспець зарэгістравацца.
На тэставанне па фізіцы абітурыент можа ўзяць з сабой калькулятар. Аднак мабільныя тэлефоны ды іншыя прылады, якія перадаюць, прымаюць і захоўваюць інфармацыю, па-ранейшаму забароненыя.
Таксама парушэннем лічыцца, калі абітурыенты мяняюцца месцамі, экзаменацыйнымі матэрыяламі, просяць аб дапамозе іншых людзей для выканання тэстаў. За гэта парушальнікаў выганяюць з ЦТ.
Наступнае цэнтралізаванае тэставанне пройдзе 27 чэрвеня. У гэты дзень абітурыенты будуць здаваць гісторыю Беларусі.