9 кастрычніка ў Вілейскім раённым судзе асудзілі мясцовага актывіста Алеся Вянгерскага. Хлопец стаў вядомы, калі падчас футбольнага матча БАТЭ-"Арсенал" выскачыў на поле з нацыянальным бел-чырвона-белым сцягам. За гэта яго асудзілі на 10 сутак. А адразу пасля адбыцця адміністрацыйнага арышту яго павезлі з Барысава ў Вілейку.
Там яго судзілі за ўдзел у акцыі супраць беларуска-расійскіх вайсковых вучэнняў "Захад-2017", якая прайшла 8 кастрычніка.
Як перадае Радыё "Свабода", з міліцэйскіх матэрыялаў вынікае, што фатаздымкі Вянгерскага на плошчы ўзятыя з інтэрнэту. Там ён стаяў з плакатам "Рускі салдат, ідзі дамоў, водкі тут няма".
Вянгерскі адмовіўся даваць суду тлумачэнні наконт акцыі 8 верасня. Яго аштрафавалі на 460 рублёў (20 базавых велічыняў).