Ці адбудзецца маштабны абмен зняволенымі? / pixabay.com
Захад і Расія ў бліжэйшы час могуць правесці маштабны абмен зняволенымі, паведамляе славенскі тэлеканал N1, які спасылаецца на свае крыніцы. Па яго даных, у абмен уключаны Расія, ЗША, Германія і Беларусь. І ён можа адбыцца ў бліжэйшыя гадзіны.
Адкуль інфармацыя ў славенскага тэлеканала? Справа ў тым, што ўдзельнікамі абмену называюцца асуджаныя ў Славеніі за шпіянаж Ганна і Арцём Дульцавы. Гэта расійскія разведчыкі, якія жылі ў гэтай краіне па аргенцінскіх пашпартах і былі затрыманыя ў пачатку 2023-га. Славенія самастойна не можа іх абмяняць, паколькі ў РФ няма зняволеных-славенцаў, але можа экстрадаваць.
Верагодна, рамках абмену ў Германію можа вярнуцца асуджаны ў Беларусі на смяротнае пакаранне і памілаваны немец Рыка Крыгер. Мяркуецца, што яго абмяняюць на супрацоўніка расійскіх спецслужбаў Вадзіма Красікава, асуджанага ў Германіі за забойства чачэнскага палявога камандзіра, палітуцекача Зелімхана Хангашвілі.
У абмен могуць быць уключаны і іншыя зняволеныя. Згадваецца карэспандэнт The Wall Street Journal Эван Гершкавіч.
Аднак да абмену, калі ён усё ж адбудзецца, афіцыйную інфармацыю не варта чакаць.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут