У Брэсцкім раёне з аграсядзібы каля вёскі Цюхінічы эвакуявалі 50 чалавек. Яе супрацоўнік касіў траву і знайшоў дзве невялікія пластыкавыя скрынкі чорнага колеру. Ён з цікавасці зазірнуў у іх і пабачыў акумулятарныя батарэі, мікрасхемы, драты. Перапалоханы мужчына распавёў пра знаходку дырэктару, а той патэлефанаваў у раённую міліцыю, інфармуе прэс-служба МУС.
На месца прыехалі міліцыянеры. Персанал і гасцей з аграсядзібы эвакуявалі. Сапёры праверылі скрынкі і нічога небяспечнага там не знайшлі. Высветлілася, што насамрэч гэта абсталяванне гульні "Лазэртаг", якая 9 траўня праводзілася на тэрыторыі аграсядзібы. 20-гадовы індывідуальны прадпрымальнік з Брэста забыўся частку сваіх рэчаў, іх яму вярнула міліцыя.