У канцы траўня ў Мінску пасля сямі гадоў рэканструкцыі плануюць адкрыць стадыён “Дынама”. Еўрарадыё паглядзела, як выглядае стадыён цяпер, і які від на Мінск адкрываецца з незвычайных асвятляльных мачтаў спартовай арэны, якія ў народзе празвалі “мухабойкамі”.
Усяго на “Дынама” паставілі чатыры 68-метровыя мачты вагой 120 тон кожная. Від на начны Мінск з вышыні мушынага палёту ўражвае! Добра бачны амаль увесь цэнтр сталіцы. Можна ўбачыць інтэрнаты БДУ на вуліцы Кастрычніцкай і берагі Свіслачы, хмарачос Royal Plaza і праспект Незалежнасці.
Здаць стадыён плануюць да 31 траўня. Пасля на працягу трох тыдняў арэна будзе працаваць у тэставым рэжыме. 21 чэрвеня, за год да Еўрапейскіх гульняў, “Дынама” адкрыюць афіцыйна.