Як беларусы выжываюць у чэргах на польскай і літоўскай межах

Чытаць болей: "Нервишки пошаливают, гигиены — ноль": белорусы стоят в очереди на границе

А вось кіроўцы легкавікоў з таго ж пункта пропуску дакладаюць адваротнае. Адзін з іх піша, што пасля чатырох гадзін у зоне чакання пашпарт на праверку так і не аддаў.

Пасажыры аўтобусаў, сумуючы, глядзяць на тое, што адбываецца з легкавікамі, з вокнаў і заўважаюць, што запускаюць "то па адной машыне ў гадзіну, то пачкамі, складана зразумець логіку".

А калі тэрмінова ў аэрапорт?

У чаце брэсцкай мяжы, стаміўшыся ад чакання ў чэргах, пасажыры пачалі перапісвацца адно з адным:

"У вашым аўтобусе мая дзяўчына едзе. Перадайце ёй, што сумую, абдымаю і чакаю. Але на самалёт з Варшавы мы ўжо не паспяваем".

Некаторыя пасажыры, спрабуючы паспець на рэйс з Варшавы, выязджаюць з Брэста за двое сутак. Іншыя перасаджваюцца з аўтобусаў у хвасце чаргі ў тыя, што стаяць бліжэй. Праўда, каштуе гэта нятанна — у чатах пішуць, што кіроўца можа запытаць за такую перасадку 100 рублёў (30 еўраў або 150 злотых). І гэта яшчэ добры варыянт. Некаторыя кіроўцы замест фіксаваных "100 рублёў" просяць пасажыраў аплаціць поўны кошт квітка.

Некаторыя аўтобусныя кампаніі робяць прадбачліва: адзін аўтобус, які стаў у чаргу раней, трымае месца для пасажыраў з іншага аўтобуса. Гэта значыць, адзін кіроўца вязе людзей ад вакзала да мяжы. І людзі, пад'ехаўшы, пераходзяць у іншы аўтобус, які стаіць бліжэй да ўезду на праверку дакументаў. А паколькі перасаджваюцца яны ў аўтобус той жа кампаніі, то і даплачваць нічога не трэба.

"Усё залежыць ад кемлівасці кіроўцаў. У іх інтарэсах рэйс туды-назад зрабіць хутчэй", — пішуць у чаце.

Лайфхак. Некаторыя прыватныя вандроўцы раяць наогул не купляць білет на аўтобус, а прыязджаць да мяжы на таксі. І адразу ж шукаць аўтобус, які стаіць бліжэй да пункта пропуску і гатовы вас узяць.

Перасесці ў іншы аўтобус ці машыну можна ў любым месцы да шлагбаўма з беларускага боку, на нейтральнай паласе або ў польскім пункце пропуску. Адным словам, у любым месцы, акрамя самога беларускага пункта пропуску (там падлічваюць колькасць людзей у транспартным сродку да і пасля выезду з пункта пропуску).

А ў адваротны бок?

Такіх страшных чэргаў на ўезд у Беларусь з польскага боку няма. Але некаторыя ўдзельнікі чата пішуць, што з аўтобуса на гутаркі часта забіраюць грамадзян Украіны і "нядобранадзейных". Праз гэтыя "гутаркі" аўтобусы могуць прастаяць у чаканні нават тры дадатковыя гадзіны.

Сапраўдная праблема — на літоўска-беларускай мяжы. У адказ на пытанне пра чэргі ў бок дома аднаму беларусу пішуць лаканічнае: "Усё дрэнна".

"Мы 17 гадзін стаім, а да шлагбаўма яшчэ далёка", — кажуць беларусы. Іншыя расказваюць, што ім давялося адстаяць 20 гадзін у чарзе, каб трапіць дадому. Трэція ад нуды лічаць машыны на ўезд у РБ і налічваюць... 270 аўто! Заўважаюць, што на транзітных нумарах — нямногія з іх (менавіта "транзіты" часта вінавацяць у чэргах у бок Беларусі).

Адзін з удзельнікаў чата піша, што спытаў у літоўскіх памежнікаў, чаму ўсё так дрэнна. Яго не абнадзеілі — кажуць, будзе толькі горш.

І 20 гадзін — гэта сапраўды не рэкорд. У чаце іншага прапускнога пункта "Беняконі" пішуць, што на мінулым тыдні стаялі ў чарзе на Беларусь... 25 гадзін! На пытанне "колькі да шлагбаўма" цяпер адказваюць: "Суткі".

Адна з беларусак, пакуль стаяла ў чарзе, сфатаграфавала з акна ... лісу. Прыкладна так ты і выглядаеш, калі чуеш, што найбліжэйшыя суткі правядзеш у чарзе.