Украіна ацэніць рызыкі ад магчымага стварэння расійскай авіябазы ў Беларусі і прыме адпаведныя рашэнні. Такую заяву зрабіў у Бруселі ўкраінскі міністр замежных спраў Павел Клімкін.
Паводле яго слоў, паколькі Беларусь уваходзіць у "вайсковы альянс пад кіраўніцтвам Расіі", Мінску давядзецца прымаць рашэнне пра расійскі ваенны аб'ект. Пакуль жа яно не прынятае, адзначыў Клімкін. У Кіеве яшчэ не ўяўляюць, якую небяспеку можа мець верагодная расійская авіябаза ў беларускім горадзе Бабруйску, інфармуе РІА "Новости".
У верасні 2015-га расійскі прэзідэнт Уладзімір Пуцін даручыў міністэрству абароны і МЗС правесці перамовы з Мінскам ды па іх выніках падпісаць пагадненне аб стварэнні ў Беларусі авіябазы. Аднак у Мінску прайшлі несанкцыянаваныя вулічныя акцыі супраць гэтага праекту. Неўзабаве Аляксандр Лукашэнка заявіў, што расійская авіябаза Беларусі не патрэбная. Гэтую тэму ён збіраўся абмеркаваць у канцы лістапада ў Маскве на сустрэчы з Пуціным, але візіт быў перанесены.
Паводле планаў Масквы, на аэрадроме ў Бабруйску збіраюцца размясціць 12 расійскіх баявых самалётаў і 4 транспартна-баявыя верталёты.
Бяссмертны: У стаўленні да Украіны я раздзяляю беларусаў і беларускія ўлады
Фота: ria.ru, АР