Кароткі агляд сусветных навін / калаж Улада Рубанава, Еўрарадыё
Адарвём вас ад беларускага парадку дня дрэннымі і добрымі навінамі з усяго свету.
Вайскоўцы Судана здзейснілі пераварот. У панядзелак лідар перавароту генерал Абдэль Фатах Бурхан распусціў цывільны ўрад, арыштаваў палітычных лідараў і абвясціў надзвычайнае становішча. Захоп улады ён паспрабаваў апраўдаць палітычнай барацьбой.
Людзі выйшлі на вуліцы ў знак пратэсту. Салдаты адкрылі агонь па натоўпе, паведамляецца, што загінулі 7 чалавек.
Яшчэ 140 чалавек пацярпелі. Міжнародная "тройка" па Судане — ЗША, Брытанія, Нарвегія — запатрабавала ад вайскоўцаў адпусціць прадстаўнікоў цывільнага ўрада.
Ні пратэсты, ні таблоіды не перашкодзілі японскай прынцэсе Мака выйсці замуж за каханне ўсяго яе жыцця. Так што Мака больш не прынцэса, а жонка юрыста Камура Кея, з якім пазнаёмілася яшчэ ў каледжы.
За некалькі дзён да вяселля, калі Кей вярнуўся ў Японію, таблоіды чарговы раз напалі на яго — гэтым разам за прычоску. "Хвосцік" не спалучаўся з вобразам жаніха прынцэсы. Зрэшты, перад цырымоніяй Кей прычоску змяніў на больш традыцыйную.
Сама ж Мака адмовілася ад каралеўскага вяселля і ад належнай аднаразовай выплаты ад каралеўскага палаца, развіталася з сям'ёй — і стала часткай іншай сям'і.
"Для мяне Кей незаменны — шлюб быў для нас неабходным выбарам", — сказала Мака.
А Кей сказаў, што хоча пражыць з ёй усё жыццё. Такая вось некаралеўская, а ўсё-ткі казачная гісторыя.
Рускія былі першымі, хто здымаў кіно ў космасе. І Джэф Безас вырашыў, што яны не стануць адзінымі. Мільярдэр заявіў, што ягоная кампанія косматурызму Blue Origin запусціць у космас камерцыйную касмічную станцыю — "Арбітальны рыф".
Запуск адбудзецца да канца дзесяцігоддзя. На рыфе зможа размясціцца да 10 чалавек. Кліентам дадуць месца і магчымасці для "стварэння фільмаў ва ўмовах мікрагравітацыі" або "правядзення перадавых даследаванняў". А яшчэ там будзе космагатэль.
А ў Сінгапуры, дзе знаходзіцца траціна каралавых рыфаў свету, прыдумалі, як абараніць і прымножыць каралы. І выкарысталі для гэтага канструктар лега!
Каралавыя рыфы абараняюць берагавую лінію, а яшчэ яны дом для тысяч рыб. Але праз меліярацыю і асваенне прыбярэжных раёнаў рыфы высільваюцца. Група навукоўцаў Нацыянальнага ўніверсітэта Сінгапура будуе каралавыя фермы, каб пасля выгадаваныя на іх каралы вяртаць у натуральнае асяроддзе.
На фермах кавалачкі каралаў мацуюцца да цаглінак канструктара. Гэтыя цаглінкі аказаліся ідэальным будаўнічым матэрыялам для каралавых фермаў.
Калі вельмі хочацца ратаваць планету, падыдуць любыя падручныя матэрыялы.
Ну і галоўная навіна тыдня: Наталля Арэйра, уругвайская зорка "Дзікага анёла", і яе сын атрымалі расійскае грамадзянства. Арэйра сказала, што яна любіць Расію больш, чым Жэрар Дэпардзьё. Для французскага актора ўся гэтая эпапея з чырвоным пашпартам — пытанне меркантыльнае. У Арэйра ўсё па любові да Расіі і расійскіх гледачоў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут