У ПВТ збіраюць звесткі, колькі айцішнікаў з'ехала з РБ пасля пачатку вайны

Кампаніі-рэзідэнты беларускага Парку высокіх тэхналогій павінны сабраць і даць інфармацыю пра супрацоўнікаў, што з'ехалі з Беларусі. Інфармацыю чакае адміністрацыя ПВТ. Пра гэта піша партал dev by.io.

Гаворка ідзе пра спецыялістаў, якія пакінулі краіну пасля пачатку вайны ва Украіне. Звесткі трэба падаць у аддзел маніторынгу дзейнасці рэзідэнтаў ПВТ да 15.00 18 сакавіка.

Для гэтага адказны прадстаўнік кампаніі павінен запоўніць спецыяльную анкету, у якой просяць пазначыць:

• Колькі чалавек перавялі ў афіляваныя офісы за мяжой у перыяд з 24 лютага па 17 сакавіка.
• Колькі чалавек плануецца яшчэ звольніць і перавесці ў афіляваныя офісы за мяжой.
• Пералік краін, заказчыкі (контрагенты) з якіх прыпынілі, скасавалі дзеянне кантрактаў (дагавораў, праектаў).
• Аб'ём кантрактаў (дагавораў, праектаў) пад пагрозай зрыву.
• Недаатрыманы аб'ём выручкі (арыентыровачна) ад скасаваных кантрактаў (дагавораў, праектаў) з 24 лютага па цяперашні час.